Үөһээ Бүлүү улууһун Мэйик оскуолатын үлэһиттэрэ Трудовой учаастагар тэриллэр обсерваторга үлэлиэхтээх персонал харыстанар көстүүмнэрин тигэн саҕалаатылар.
edersaas.ru, Валентина Попова
Барыта 70 миэтэрэ таҥастан төһө тахсарынан тигиэхтээхтэр. Ыарыыны кыайар туһугар ыытыллар тэрээһиннэргэ бары көхтөөхтүк кыттыһабыт.
Улуустааҕы оперативнай штаб, Роспотребнадзор, үөрэх салалтата, бары тэрилтэлэр бу ыарахан ыарыы тарҕаныытын сэрэтэр туһуттан, араас тэрээһиннэри тэрийэ, күүстээх үлэни ыыта олороллорун истэн, хайдах эрэ харысхаллаах, хаххалаах курдук сананабыт.
Бары турунан эрэ, ирдэбиллэри толордохпутуна, бэйэбит бэйэбитигэр эппиэтинэстээх буоллахпытына, бу уустук кэми этэҥҥэ ааһыахпыт дии саныыбын. Чугас дьоммутугар-сэргэбитигэр, оҕолорбутугар, нэһилиэк олохтоохторугар харысхаллаахтык сыһыаннастахпытына эрэ, этэҥҥэ буолуохпут. Бары түмсэн, биир киһи курдук, бу ыарыыны нэһилиэктэрбитигэр, улууспутугар киллэрбэт туһугар турунуоҕун!
⠀⠀Мэйик орто оскуолатын дириэктэрэ Валентина Попова