Өрөспүүбүлүкэ ситэриилээх былааһын уорганнарын, Роспотребнадзор управлениетын уонна быраабы араҥаччылыыр уорганнар сүрүн болҕомтолоро нэһилиэнньэни кытары үлэҕэ ууруллар.
“Уодаһыннаах вирустан көмүскэнии сүрүн миэрэтэ – дьиэҕэ олоруу эбэтэр обсерваторга киирии”, – диэн СӨ бырабыыталыстыбатын бэрэссэдээтэлин солбуйааччы Ольга Балабкина коронавирус инфекциятын киллэриини уонна тарҕатыыны бопсор суһал штаб брифинин кэмигэр иһитиннэрдэ.
edersaas.ru
Саха сиригэр үлэлиир лабораторияларга 12 тыһыынчаттан тахса киһи анаалыһа бэрэбиэркэлэннэ. Сотору Алдан уонна Илин эҥэр улуустарыгар лабораториялар аһыллаллара былааннанар.
Биллэрин курдук, коронавирус инфекциятыгар сыстар кутталлаах бөлөххө үгүс араҥа (60 саастарын аһарбыт дьон, ааһан-араҕан биэрбэт сүрэх-тымыр, тыынар уорган ыарыылаахтар, саахарынай диабеттаахтар, ону сэргэ Саха сирин тас өттүттэн кэлээччилэр, эмчиттэр, быраабы араҥаччылыыр уорганнар үлэһиттэрэ, волонтердар) киирсэр. Кинилэр бары эмчиттэр болҕомтолоругар сылдьаллар.
Саха сиригэр обсерватордар ахсааннара эбиллэр. Ол туһунан Ольга Балабкина: “Хас биирдии киһи коронавирус кутталлааҕын уонна вируһу дьиэ кэргэҥҥэ аҕалыан кэриэтэ, обсерваторга киирэрэ ордугун өйдүөхтээх”, – диэтэ.
Билигин Дьокуускайга коронавирустан үс киһи эмтэнэ сылдьар, биирдэрэ үтүөрэн эрэр. Горнай улууһуттан кэргэнниилэр Дьокуускай куорат обсерваторыгар бааллар.
Надежда ЕГОРОВА, “Саха сирэ”, edersaas.ru