Арктикатааҕы агротехнологическай университет уопсайыгар обсерватор арыллыаҕа

Сарсын, ыам ыйын 4 күнүгэр, Арктикатааҕы судаарыстыбаннай агротехнологическай университет (ДьСХА) уопсайыгар обсерватор арыллыаҕа. Бу туһунан Дьокуускай уокуруктааҕы дьаһалтатын пресс-сулууспата иһитиннэрэр.

«Обсерватор куорат бүддьүөтүн суотугар тэриллэр. Үлэһиттэри хамнастыырга, хааччахтанар дьону олордорго, аһатарга, бытовой тиэхиньикэ, дезинфекциялыыр сириэстибэ о.д.а. атыылаһарга Дьокуускай резервнэй пуондатыттан 7,5 мөлүйүөн солкуобай көрүлүннэ», — диэн иһитиннэрэллэр.

Бу Дьокуускайга алтыс обсерватор буолуоҕа. Манна муҥутаан 120 киһи киириэн сөп, 25 киһи үлэлиэҕэ.

Ыам ыйын 3 күнүнээҕи дааннайдарынан, Дьокуускай обсерватордарыгар 280 киһи хааччахтаныыга баар.

edersaas.ru

Хаартыска — Дьокуускай уокуруктааҕы дьаһалтатыттан.