Бүгүн, муус устар 21 күнүгэр, киэһэ 18:00 чааска Саха Өрөспүүбүлүкэтин бырабыыталыстыбатын бэрэссэдээтэлин солбуйааччы, корнавируһу бохсууга өрөспүүбүлүкэтээҕи суһал ыстаап салайааччытын солбуйааччы Ольга Балабкина коронавирус дьаҥын бохсууга тэриллибит дьаһаллар тустарынан иһитиннэрдэ.
edersaas.ru
— Саха Өрөспүүбүлүкэтэ көрүллүбүт көмөнү, босуобуйалары тустаахтарга тиэрдиигэ сэттэ бастыҥ эрэгийиэн иһигэр киирдэ, – диэтэ кини. – Ити үлэ тустаах биэдэмистибэлэр чуолкайдык уонна ситимнээхтик бииргэ үлэлээбиттэрин түмүгэр, туох да балакыытата суох оҥоһулунна. Холобур, оҕолорго көрүллүбүт көмө харчы ийэ электроннай көрүҥүнэн түһэрбит сайаапкатыгар олоҕуран бэрилиннэ.
Коронавирус ыарыытын бохсор, салгыы тарҕаппат туһуттан хааччахтыыр дьаһаллар ылыллаллар, ыалдьыбыт уонна ыарыыга уорбаланар дьону обсерваторга сытыаран көрүллэр-истиллэр. Обсерватордары ИДьМ үлэһиттэрэ уонна Росгвардия байыастара харабыллыыллар эрээри, хомойуох иһин, көҥүлэ суох барыы, күрээһин түбэлтэлэрэ таҕыстылар. Биир түбэлтэ киһи өлүүлээх буола. Эмтэнэр дьоннор бэйэлэрин эрэ тустарынан буолбакка, атын дьону эмиэ саныахтаахтар, ыарыыны тарҕатыыга эппиэтинэһи сүгэллэрин өйдүөхтээхтэр, кэлэр өтүгэр маннык хатыланыа суохтаах.
Ыарыы дьиэ кэргэн иһигэр эмиэ тарҕанарын кэргэнниилэр ыалдьыбыттара көрдөрдө, ону таһынан сааһырбыт дьон ордук ыараханнык киирэрэ билиннэ. Ол курдук, өрөспүүбүлүкэ үрдүнэн ыалдьыбыт 116 киһиттэн икки аҕам саастаах (биир 65-тээх, иккис 82-тээх) дьон ордук ыарахан туруктаахтар.
Бэҕэһээҥҥиттэн Алдан куоракка уонна Ленинскэй бөһүөлэгэр кэлиини-барыыны бэрээдэктиир, хонтуруоллуур уонна дьаҥ тарҕаныытын бохсор туһуттан массыынанан айаннааччыларга «цифровой пропуск» олохтонно. Бүгүҥҥү туругунан, 30 суоппарга маннык пропуск бэрилиннэ.
Ленскэйгэ 5 киһи эмтэнэр. Чайыҥдаҕа 11ыалдьыбыт, 40-ча хантаахтаах киһи баар, ыалдьыбыт 12 киһи Ямал-Ненец автономнай уокуругар ыытыллыбыта. Билигин онно тустаах хампаанньа эмчиттэрин таһынан, Дьокуускайтан Доруобуйа харыстабылын министиэристибэтин биригээдэтэ, уон быраас баран үлэлии сылдьаллар. Түгэнинэн туһанан, биһиги кинилэргэ уонна көҥүллээн ыыппыт дьиэ кэргэттэригэр махталбытын биллэрэбит.
Раиса Сибирякова, «Саха сирэ» хаһыат, edersaas.ru