Муус устар 21 күнүгэр Бүлүү улууһун суһал ыстааба иһитиннэрбитинэн, улууска үс киһи коронавирус дьаҥар хаптарбыт.
Балартан иккитэ улууска, биир киһи Дьокуускайга эмтэниини ааһа сылльаллар.
Маны таһынан улуус киинигэр эмтэнэ киирэн баран хантаактаспыт дьону муус устар 7 күнүгэр обсерваторга киллэрбиттэрэ.
Балартан обсерваторга киирбит 1968 с.т. эр киһи икки нэдиэлэ устата бүгэн олоруу болдьоҕун тулуйбакка, обсерватортан куотаары үһүс этээстэн түннүгүнэн ыстанан суорума суолланна.
«Хомойуох иһин, 53 саастаах биир пациент обсерватортан куотаары үһүс этээстэн ыстанан, суорума суолланна. Обсерваторга пациент тустаах усулуобуйаҕа олороругар барыта баар. Суукканы быһа харабыллыыллар, медиктэр үлэлииллэр. Бу киһи хаста да күрүү сатаабыт, бу үһүс сырыыта эбит«, — диэн СИА-ҕа улуус баһылыга Сергей Винокуров иһитиннэрдэ.
Сергей Винокуров нэһилиэнньэҕэ туһаайан, уустук кэмҥэ дьиэҕэ олоруохха, вирустан харыстаныахха диэн ыҥырар.
Ульяна ЗАХАРОВА, edersaas.ru