Тымныы полюһа Өймөкөөн улууһун Томтор нэһилиэгин биир кэрэ көстүүлээх тутуутунан Обручев искибиэрэ буолла.
edersaas.ru
Бу эбийиэк олохтоохтор бырайыактарын көҕүлүүр бырагыраамаларын (ППМИ) чэрчитинэн тутуллубута. Искибиэр бырайыагын оҥорууну өрөспүүбүлүкэтээҕи бөһүөлэктэри тупсарар «LETO YAKUTIA» киин архитектора Прокопий Рожин сүрүннээбитэ. Билигин «Обручев искибиэрэ» дэнэр нэһилиэк биир кэрэ көстүүлээх эбийиэгэ дьон кэлэн сынньанар, күүлэйдиир сиринэн буолла.
— Томтор араас омук туристара Тымныы полюһун көрөөрү анаан кэлэр сирдэринэн буолар. Онон нэһилиэккэ туризмы сайыннарыыга баһылык Никифор Протопопов салайыытынан араас кэскиллээх бырайыактары олоххо киллэрии, киһи кэрэхсиир бэлиэ сирдэрин тупсарыы былааннаахтык ыытыллар. Өймөкөөн улууһун Тымныы полюһа буоларын бигэргэппит чинчийээччи-учуонай геолог Сергей Обручевка Томтор олохтоохторун махталларын бэлиэтинэн бу искибиэр тутуута буолла. Өрөспүүбүлүкэтээҕи бөһүөлэктэри тупсарар «LETO YAKUTIA» архитектордарын кытта биһиги бииргэ үлэлээһиммитин саҕалыахпытыттан ыла үгүс бырайыактары олоххо киллэрэр былааннаахпыт, — диэн улуус баһылыга Иннокентий Сивцев санаатын үллэһиннэ.
… Өймөкөөн улууһугар туризмы сайыннарыыга олохтоохтук ылсан, кэлиҥҥи кэмҥэ нэһилиэктэргэ тупсарыы үлэтэ тэтимнээхтик барар.
Елена ПОТОЦКАЯ, «Саха сирэ» хаһыат, edersaas.ru