Оборуона министиэристибэтин инженернэй ротата ойуур баһаарын умуруорарга көмөлөһөр
Оборуона министиэристибэтин холбоһуктаах инженернэй ротата, 109 киһи уонна 16 тиэхиньикэ, ойуур баһаарын умулларыыга көмөлөһө кэллэ.
Бырабыыталыстыба Бэрэссэдээтэлин бастакы солбуйааччы Дмитрий Садовников иһитиннэрбитинэн, тимир суолунан Аллараа Бэстээххэ диэри аҕалыллар эбии тиэхиньикэ хаһан куруустанарынан көрөн, икки бөлөххө араарыллыаҕа. Көмөҕө кэлбит инженернэй рота Үөһээ Бүлүү улууһугар үлэлии барда.
Владимир Путин сорудаҕынан, Оборуона министиэристибэтэ ойуур баһаарын умуруорууга көхтөөхтүк көмөлөһөр: ол курдук билигин армейскай авиация Ми-8 бөртөлүөттэрэ уонна салгыннааҕы космическай күүстэр Ил-76 сөмөлүөттэрэ үлэлии сылдьаллар. Ил-76 сөмөлүөттэр 42 туонна ууну баһан кутар прибордаахтар, оттон Ми-8 бөртөлүөттэр ВСУ-5 диэн 5 туонна ууну кутар тэриллээхтэр. Ойуур баһаарын умуорууга үлэлиир лүөччүктэр сөптөөх бэлэмнэниини бардылар. Бу туһунан Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова, «Саха сирэ», edersaas.ru