Дьокуускай Арассыыйаҕа облачнай технологиялары айар киининэн буолар кыахтаах
Дьокуускайга облачнай сервис бөдөҥ аан дойдутааҕы провайдерын офиһын арыйыы былааннанар, ити куоракка маннык технологиялар кииннэринэн буолар кыаҕы биэрэр. Бу туһунан Айсен Николаев Bespin Global Корея хампаанньатын салалтатын кытта көрсүһүү кэмигэр эттэ.
“Саха сиригэр хостуур бырамыысыланнас сайынна, ону сэргэ Дьокуускай бүгүн Уһук Илиҥҥэ IT сайдыытын киининэн буолар. Биһиги курдук тэйиччи сытар региоҥҥа цифровизация аан дойду ырыынагар тахсарбытыгар көмөлөһүөҕэ. Биллэн турар, бу салааҕа ситиһиилэммит бөдөҥ хампаанньалары кытта бииргэ үлэлиэхтээхпит”, — диэтэ Саха сирин баһылыга омук дэлэгээссийэтигэр.
Bespin Global хампаанньатын хос төрүттээччитэ уонна стратегическай сайдыыга дириэктэрэ Пак Кенг Хун кинилэр Саха Өрөспүүбүлүкэтигэр интэриэстэрэ Саха сирин IT хампаанньаларыгар тус инвестицияларын уопутунан бигэргэнэр. Кини олохтоох программистар уонна инженердэр үрдүк таһымнарыгар эрэнэр.
Хампаанньа былааныгар – ХИФУ Математика уонна информатика институтун баазатыгар үөрэтэр киини тэрийии. Бу көмөтүнэн Саха сирин олохтоохторо облачнай технологиялар эйгэлэригэр сертификация ылан, хампаанньаҕа үлэлиир кыахтаныахтара.
Саха сиринээҕи офис аһыллар түгэнигэр Корея хампаанньата 2019 сылга 50 тахса үлэ миэстэтин арыйар баҕалаах.
Омук дэлэгээссийэтэ Дьокуускайга хас да күн үлэлиэҕэ. Бырайыагы сүрүннүүр Саха Өрөспүүбүлүкэтин Сайдыыга корпорацията иһитиннэрбитинэн, ыалдьыттар IT-экотиһиги кытта билсиһиэхтэрэ, үлэҕэ ылар дьонун кытта кэпсэтиэхтэрэ.
Санатан эттэххэ, хампаанньа офистара Соҕуруу Кореяҕа, Кытайга уонна Холбоһуктаах Арабскай Эмираттарга аһыллыбыттара. Провайдер килийиэннэрин ортолоругар Hyundai, Samsung, LG, Alibaba, SoftBank Group, McDonalds, Burger King уо.д.а. бааллар
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.