Аны күһүҥҥүттэн Сунтаардааҕы Гуманитарнай гимназияҕа (дириэктэр Л.Е. Евсеева) литературнай устуудьуйа үлэлиэҕэ. Мирнэйдээҕи «Алмаастаах куорсун» («Алмазное перо») литературнай түмсүү иһинэн үлэлиэхтээх устуудьуйаны поэтесса, СӨ Суруйааччыларын сойууһун чилиэнэ Александра Григорьева-Сандаарыйа салайыаҕа.
edersaas.ru
Оҕолор тыл култууратыгар, литература теориятыгар дьарыктаныахтара. Ону сэргэ, рецензия суруйарга, айымньылары ырытарга үөрэниэхтэрэ, классик уонна аныгы суруйааччылар айымньыларын билсиһиэхтэрэ.
Оскуола хаһыатын ахсаанын элбэтэн, кэҥэтэн, Мирнэйгэ тахсар «Вилюйские зори» альманаҕы кытта ыкса ситимнээхтик үлэлиэхтэрэ. Ону тэҥэ оҕолор маҥнайгы айымньыларынан «Алгыстаах аартык» диэн кинигэ серията олохтонуо.
Мирнэй куорат суруйааччылара устуудьуйа оҕолоругар араас көрсүһүүлэри, литература араас боппуруостарыгар сэминээрдэри, поэзия киэһэлэрин тэрийиэхтэрэ. Оҕолор сааскы каникулларыгар алмаастаах куоракка кэлэн, куорат айар дьоҕурдаах оҕолорун кытары көрсүһүөхтэрэ, Политехническай институкка, мусуойдарга, куорат бэлиэ миэстэлэригэр экскурсияларга, катокка, бассейҥҥа сылльыахтара.
Александра Григорьева Мирнэйгэ суруйааччылары, саҥа тахсан эрэр ааптардары кытары үлэлиир улахан үөрүйэхтээх. Мирнэй улууһун литературнай түмсүүлэрин үлэтэ-хамнаһа өрөспүүбүлүкэҕэ тиийэ биллэр, киэҥниҥ сырдатыллар.
Сандаарыйа эдэр суруйааччылар мунньахтарыгар бэлэмнээбит оҕолоро «Открытие года» номинацияҕа кыайбыттара. 15 оҕо айымньыта «Бичик» кинигэ кыһатыгар босхо бэчээттэммиттэрэ. Кинилэр ортолоругар Ньургуйаана Григорьева (Сунтаар), Тома Егорова (Дьокуускай к.), Андрей Шушминцев (Мииринэй), Шура Семенова (Сунтаар с. ) Ксюша Михайлова (Элгээйи с.), Сергей Миронов (Элгээйи с.) уо.д.а. бааллар.
Суруйааччы ону сэргэ Сунтаар 1 нүөмэрдээх оскуолатын үөрэнээччилэрин уонна учууталларын хомуурунньугун, «Айыы Кыһата» оскуола (дириэктэр Л.П. Шамаева) хомуурунньуктарын бэчээккэ бэлэмнээн таһаартарбыта.
Надежда ЕГОРОВА, «Саха сирэ» хаһыат, edersaas.ru,