Илиҥҥи дойдуларга Саҥа дьыл олунньу 12 күнүгэр саҥа үүнэр. Кытайга 4719 сылы – Оҕус (Ынах) сылын көрсөллөр. Кинилэргэ сылы ааҕыылара атын. Кытайдар Саҥа дьылы олус киэҥ далааһыннаахтык, маассабайдык бырааһынньыктыыллар. Оҕус сыла Москва бириэмэтинэн олунньу 11 күнүгэр киэһэ уон чаас 5 мүнүүтэҕэ үүнэр.
Эһиил Тигр сыла 2022 сыл олунньу 1 күнүгэр үүнүөҕэ.
Буддистар Саҥа дьылга Сагалха (Сагаалган) бырааһынньыктара саҕаланар. Эмиэ кытайдар курдук, 15 күнү быһа бырааһынньыктыыллар. Урут григорианскай халандаарга кинилэргэ төрөөбүт күн диэн суоҕа, оҕо сааһын Сагалха күнүттэн ааҕаллара.
Үрүҥ Ый бырааһынньыгар ыраастаналлар, хомуналлар. Саҥа дьыл күнүгэр ас бөҕөтүн астыыллар, үлэлээбэттэр, Таҥараҕа үҥэллэр, куһаҕаны санаабаттар, оҥорботтор. 15 күн устата аймахтарыгар ыалдьыттаһаллар, бэлэх бэрсэллэр, үтүөнү оҥорорго кыһаллаллар. Бу күннэри хайдах аһараҕын да, сылыҥ оннук ааһар дииллэр.
Ону тэҥэ, араас сиэри-туому толороллор. Холобур, Баай-дуол таҥаратын маанылаан көрсөллөр, онуоха ааннарын, түннүктэрин аһаллар, алтаарга ас уураллар, үҥэллэр. 108 апельсины дьиэҕэ төкүнүтэн киллэрдэххэ, бу сылга баай-дуол, уйгу-быйаҥ баар буолар диэн итэҕэйэллэр.
Бурятияҕа бу күн өрөбүл күнүнэн биллэриллэр.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru