Мэҥэ Хаҥаласка, 2-c Наахара нэһилиэгэр, ааспыт сылтан «Оһуор түһүлгэтэ» диэн дьахталларга куруһуок тэриллибитэ.
edersaas.ru
Бу туһунан куруһуок чилиэнэ Асида Васильева кэпсиир:
— Аан маҥнай, 2017 сыллаахха саҕалыырбытыгар, норуот маастара, биир дойдулаахпыт Анастасия Бубякина кэлэн аттаран, кыбытан тигии кистэлэҥнэригэр икки хонук устата биһиэхэ маастар-кылаас ыыппыта.
Онон сиэттэрэн, дьоҕус түмсүү тэриммиппит. Улууска ыытыллар култуура уонна спорт эстафетатыгар, онтон да атын араас быыстапкаларга кыттар буолбуппут.
Нөҥүө сылыгар Анастасия Ивановна биһиэхэ кэлэн өҥү сөпкө таларга, кыбытан тигии араас ньымаларыгар, сиик кистэлэҥэр үөрэппитэ.
Онтон ыла куруһуок быһыытынан үлэлээн кэллибит. Салайааччыбытынан педагогическай үлэ бэтэрээнэ Февралина Луковцева буолар.
Бу сылларга иис кистэлэҥигэр элбэх киһи сөбүлээн үөрэннэ. Ордук 2018 сылга тэрилтэлэринэн дьаралык тигиигэ сорудахтааннар, онно үгүс киһи үөрэммитэ, ким сололооҕунан иистэммитэ. Ааспыт сылтан куруһуокпут «Оһуор түһүлгэтэ» диэн ааттанан үлэлиир. Аттаран тигиинэн эрэ муҥурдаммакка, хайысхабыт кэҥээн иһэр.
Ол курдук, сиэлинэн (сал. Светлана Корнилова), туоһунан (сал. Анастасия Васильева), оҕуруонан (сал. Лидия Гаврильева), иис араас көрүҥнэринэн (сал. Октябрина Платонова), аттаран тигиинэн (сал. Февралина Луковцева, Мария Григорьева) дьарыктанабыт уонна маһынан уһаныыга (сал. Виктор Аргунов) эмиэ элбэх киһи кэрэхсээн сылдьар. Инникитин дьарыкпыт көрүҥэ кэҥээн иһиэн баҕарабыт.
Ити курдук, билигин дьиэҕэ олорор кэмҥэ, «Оһуор түһүлгэтэ» куруһуок чилиэннэрэ сөбүлүүр дьарыктарыгар, аны, дьиэлээхтэрин уһуйаллар.
Елена ПОТОЦКАЯ, «Саха сирэ» хаһыат, edersaas.ru