«Оһуокай» түмсүү 30 сылынан бүгүн Саҥа Дьыл алыптаах киэһэтигэр ыҥырар

Бүгүн, ахсынньы 31 күнүгэр, күнүс 12 чаас 30 мүнүүтэттэн Дьокуускайга Арчы дьиэтигэр “Оһуокай” түмсүү тэриллибитэ 30 сыллаах үбүлүөйүгэр анаммыт “Саҥа Дьыл алыптаах киэһэтэ” тэрээһин ыытыллар.

Бырааһынньыгы Саха сирин Дархан этээччитэ Анатолий Иванович Кривошапкин алгыстаах оһуокайынан арыйыа. Саха Өрөспүүбүлүкэтин култууратын үтүөлээх үлэһитэ, биллиилээх мелодист, саха норуотун тапталлаах ырыаһыта Галина Шахурдина ырыанан эҕэрдэлиэ. Онтон Саҥа дьыллааҕы маскарааттары көрүү, Эһээ Дьылы уонна Хаарчаананы көрсүһүү кэнниттэн Дархан этээччи Егор Михайлович Осипов саҥа сылы уруйдаан, үҥкүү тылын таһаарыа.

Киэһэ 5 чааска  “Дьол тосхоло” диэн киирии билиэтинэн лотерея оонньонуо. Ким бааттаах тэлэбииһэр, пылесос, блендер, өтүүк, о.д.а. сыаналаах малга тиксэн, дьиэтигэр Саҥа сылынан босхо кэһиилээх тиийиэ. Киирии билиэт сыаната баара-суоҕа биир мөһөөх солкуобай. Киин куорат олохтоохторун уонна ыалдьыттарын алыптаах киэһэ уоттаах-күөстээх үҥкүү, көрдөөх-нардаах оонньуу күүтэллэр.

Василий НИКИФОРОВ, «Саха сирэ» хаhыат,  edersaas.ru