Быйыл саха литэрэтиирэтин төрүттээбит суруйааччы, биллиилээх диэйэтэл П.А.Ойуунускай төрөөбүтэ 125 сылынан сибээстээн, Туймаада ыһыаҕын кэмигэр “Улуу Туймааданы уруйдуубут” диэн оһуокай этээччилэр куонкурустара буола турар.
edersaas.ru Саха сирин улуустарыттан барытыттан кэриэтэ кыттыылаах киэҥ тэрээһин. Ол курдук, Үөһээ Бүлүүттэн алта, Намтан үс, атын улуустартан биирдии-иккилии, уопсайа, 30 киһи кэлэн кытта сылдьар.
“Биллэр оһуокайдьыттартан Аар Дархан этээччи Егор Осипов (Дьокуускай к.) кыттар. Күрэхтэһиини кини арыйда. Дьон саҥа кэлэн эрдэҕинэ саҕалаабыта эрээри, лоп курдук, кини этэр кэмигэр оһуокайга 125 киһи киирбит диэн аахтыбыт. Ойуунускай 125 сылыгар, 125 этээччи. Ураты бэлиэ. Инньэ гынан, Егор Михайлович оһуокайа күүстээхтик ааста. Эмиэ Саха сирин Дархан этээччитэ Дьэргэлгэн Хорунов (Нам) кэллэ. Кини оһуокайын билбэт киһи диэн суох. Аптаах оһуохай. Киирбит дьон икки төгүл күүһүрэллэр, икки төгүл доруобуйалара тупсар. Ити чахчы. Адьас аттыгар сылдьыбыт төрөөбөт дьахталлар төрүүр буолаллар”, — диэн Саха сирин “Оһуокай” түмсүү салайааччыта Александр Данилов кэпсиир.
Бииртэн биир күүстээх этээччи сүрүн түһүлгэҕэ мустубут дьону ыҥыра угуйар. Кинилэри кытта микрофон иилиммит эдэр киһиэхэ хараҕым хатана түһэр. Аҕыйах ыйытыыга хоруйдууругар көрдөстүм. Дьокуускайдааҕы култуура уонна искусство кэллиэһин 1 кууруһун устудьуона Вольдемар Львов:
— Оһуохайынан дьарыктаммытым сыл буолан эрэр, үөрэнэ киириэхпиттэн. Оһуохай урут-уруккуттан саха бастыҥ, сөбүлүүр үҥкүүтэ буоллаҕа. Этэр кэмҥэ кынат-этээччилэр үчүгэй буоллахтарына, маҥнай наллаан этэҕин. Оччоҕо этим-сииним хамсыырын билбэт да курдук үчүгэй турукка киирэбин. Күрэхтэһии сүүмэрдээһинэ бэс ыйын 12 күнүгэр ааспыта. Көннөрү кыттан көрөөрү киирэн баран ааһан хаалбытым. Улуу, Дархан этээччилэри кытта күөн көрсөрбүттэн долгуйабын. Дьиҥэр, бириис туһугар буолбакка, бэйэбин холонон көрөөрү, сыаналанаары, туохха сыыһарбын, тугу ситэрэн биэрэр ирдэнэрин билээри кыттабын. Аҕа саастаах уонна үчүгэйдик этэр дьонтон киһи чахчы элбэххэ үөрэнэр, – диэн санаатын үллэстэр. Түмүк бүгүн түүн биллэр. Кыайыылаах массыына хаһаайынынан буолар.
Людмила ПОПОВА, “Саха сирэ” хаһыат, edersaas.ru
Ааптар хаартыскаҕа түһэриилэрэ.