Муус устар 24 күнүгэр Саха Өрөспүүбүлүкэтин Култууратын уонна духуобунай сайдыытын министиэристибэтин көҕүлээһининэн, «Оһуохай Ассоциацията» тэрилиннэ.
edersaas.ru
Ассоциация салайааччытынан СӨ үтүөлээх артыыһа, СӨ култууратын туйгуна, Олоҥхо тыйаатырын артыыһа, оһуохайдьыт Дмитрий Семенович Иванов буолла. Ассоциацияны олохтуур мунньахха саха сирин учуонай-фольклористара, оһуохайдьыттар, уопсастыбыннай түмсүүлэр кыттыыны ыллылар.
Мунньах түмүгэр өрөспүүбүлүкэҕэ Оһуохай ассоциацията тэриллэрэ хайаан да наадатын, Айыы итэҕэлин кытары ситимнээх үҥкүүлэри уонна түөлбэнэн уратыларын биир кэлимник чинчийии, тиэкистэри сөргүтүү, бэчээккэ таһаарыы өттүгэр болҕомто күүскэ ууруллар кэмэ кэллэ диэн санаа этилиннэ. Оһуохай оҥкулун чопчу быһааран, сиһилии ырытан, дьоҥҥо – сэргэҕэ сөптөөх санааны тиэрдэр үлэ ыытыллыан наадатын туһунан тоһоҕолоон бэлиэтэннэ. Маныаха бу Ассоциация тэриллэн үлэлиирэ ордук суолталаах буолуо, диэн иһитиннэрэр министиэристибэ пресс-сулууспата.
Инникитин саха норуотун оһуохайын үҥкүүтүн үрдүк ускуустуба таһымыгар таһааран, ЮНЕСКО нэһилиэстибэтигэр киллэрэр сыаллаах-соруктаах үлэ ыытыллыахтааҕын туһунан үгүс чинчийээччи бэлиэтээтэ.
Татьяна МАРКОВА, edersaas.ru