Дьокуускайга Саха сирин норуоттарын музыкатын уонна фольклорун түмэлигэр М.Н. Винокуров «Оһуохай араастарыгар методическай көмө видеоурок» диэн видеонан уруогун биһирэмэ ыытылынна.
Михаил Николаевич Винокуров А.Д.Макарова аатынан култуура уонна искусство кэллиэһин «норуот уус-уран айымньыта» салаа преподавателэ, импровизатор-хомусчут, СӨ култууратын туйгуна.
Видеонан уруок икки чаастаах: 1. Теория – импровизатор-хомусчут, СӨ култууратын туйгуна, култуура уонна искусство кэллиэһин преподавателэ М.Н. Винокуров лиэксийэтэ. 2. Практика – РФ култууратын үтүөлээх үлэһитэ, САССР үтүөлээх артыыһа, СӨ үөрэҕирии туйгуна А.С. Федоров ньыматынан дьарык уонна улуустар оһуохайдарын 13 арааһын кэллиэс оҕолорун толоруулара.
Видеонан уруок учууталларга, норуот уус-уран култууратын преподавателлэригэр, уус-уран айар кэлэктииптэр салайааччыларыгар, историяны, саха норуотун үгэһин, фольклорун сэргиир, сэҥээрэр дьоҥҥо интэриэһинэй буолуоҕа. Видеонан уруогу Саха сирин норуоттарын музыкатын уонна фольклорун түмэлиттэн ылыахха сөп. 8(4112)35-38-84 нүөмэргэ эрийэн ыйыталлар.