Сандал саас кэлэн, ынах сүөһү төрүөҕэ саҕаланна, ону кытары даҕаспытынан бэтэринээрдэр түбүктэрэ үксээтэ.
edersaas.ru
Ньурба улууһун Күндээдэ нэһилиэгин бэтэринээрдэрэ «Кэскил» диэн бастакытын төрүүр ынах кыайан «быыһаммакка» турарын истэн суһаллык онно барбыттара. Көрүү-истии түмүгүнэн, ынах маатката эриллибитэ биллибитэ. Көннөрө сатаабыттара даҕаны, кыаллыбатаҕа, ол иһин уопутаах бэтэринээр быраас Тамара Варламова ынах оҕотун быһа ыларга быһаарбыта.
Эпэрээссийэни хотоҥҥо, ынаҕы туруоран эрэ оҥорбуттара. Бары ирдэбили тутуһан, хайытар сирдэрин түүтүн кырыйбыттара, хаһаайыстыбаннай мыыланан сууйбуттара, быһар сирдэрин дьуотунан соппуттара. Анестезия оҥорон баран, ынах иһин хайытан, ньирэйи курдат ылбыттара. Эпэрээссийэ кэнниттэн Кэскил тымырыгар Рингер-Лок суурадаһынын уонна антибиотик укуоллары биэрбиттэрэ. Хомойуох иһин, ньирэй кыайан быыһаммата, оттон ынах этэҥҥэ. Бааһа үчүгэйдик оһон эрэр уонна ыатар. Бааһа остоҕуна, тигиллибит сабын ылыахтара.
Раиса СИБИРЯКОВА, «Саха сирэ» edersaas.ru