РФ Силиэстийэлиир кэмитиэтин Саха сиринээҕи управлениета иһитиннэрбитинэн, бу дьыл муус устар 3 күнүгэр балыыһаҕа биирин сэттэ ый ааспыт кырачаан оҕо киллэриллибит.
Вера МАКАРОВА, «Саха сирэ» хаһыат, edersaas.ru
Харытын, саннын хаптаҕайын уонна тааһын уҥуохтара тостубут, төбөтө доргуйбут, тылын быһа ыстаабыт.
Оҕо олорор аадырыһыгар Силиэстийэлиир управление, ИДьМ экспертнэй уонна суһал подразделениеларын сотрудниктара тиийбиттэр.
Онно быһаарыллыбытынан, муус устар 3 күнүгэр дьахтар көлүөһэлэрдээх «ходунокка» турар оҕотун күүскэ аспытыгар, уолчаана батарыайаҕа тиийэн охсуллан, өйүн сүтэрбит.
Доппуруос кэмигэр ийэ буолуохсут «оҕом үрдүгэр ыскаап сууллаары гыммытыттан өрүһүйэ сатаабытым» диэн көрдөрбүтүн, силиэдэбэтэллэр саарбахтаабыттар — оҕоҕо урукку эчэйии суоллара бааллар эбит.
Бу чахчынан РФ Холуобунай кодексатын 111-с ыст. 2-с чааһын «б» пуунунан холуобунай дьыала тэрилиннэ. Ол эбэтэр, кыра саастаах оҕо олоҕор кутталлаах, доруобуйатыгар ыарахан эмсэҕэлээһини соруйан оҥоруу бэлиэтэ баарынан.
Уорбаланааччы ийэҕэ хааччахтыыр миэрэ быһыытынан, ханна да барбат туһунан баппыыска туттулунна.
Оҕо балыыһаҕа ыарахан туруктаах сытар. Дьыала силиэстийэлэнэр.
Вера МАКАРОВА, «Саха сирэ» хаһыат, edersaas.ru
Хаартыска: интернеттэн ылылынна.