Оҕону сахалыы иитии бастакы бэстибээлэ табылынна

Ааптар: 
Бөлөххө киир:

Эдэр ийэлэр түмсэн, сүрэхтэрин баҕатынан Дьокуускай куорат кырачаан олохтоохторугар, төрөппүттэргэ анаан “Саха оҕотун төрөөбүт тылынан иитии” бастакы бэстибээлин тэрийэн ыыттылар. Урутаан эттэххэ, бэстибээл табылынна.

Саха сирэ” хаһыат, edersaas.ru

Тэрээһин икки сүрүн былаһаакканан барда. Барыта 30-ча тэрилтэ кытынна. Кырчааннарга уруһуй, остуол оонньуулара, хамсаныылаах оонньуулар, маастар-кылаастар, куонкурустар, исписэлиистэр сүбэлэрэ бааллар. Төрөппүттэргэ, исписэлиистэргэ араас туһалаах сэминээрдэри, маастар-кылаастары ыыттылар, сахалыы кинигэлэри, оонньуурдары, таҥастары атыылаатылар. Бу күн кэлбит биир даҕаны оҕо, төрөппүт бириэмэтин халтай ыыппыта дуу, туһата суох атаарбыта дуу диэн суох.

Тэрээһин туһунан Инстаграмтан истэн кэллибит. Оҕону сахалыы иитии сэминээрин истиэхпин баҕарбытым эрээри, оҕолорбун илдьэ сылдьар буолан, кэмпириэнсийэҕэ кыайан сылдьыбатым. Дьиэбитигэр сахалыы эрэ кэпсэтэбит. Туох баар остуоруйаны, ойуу киинэлэри (мультфильм) барытын тылбаастаан биэрэбин. Оҕолорбутун сахалыы уһуйааҥҥа, саха бөлөҕөр биэрбиппит эрээри, сорох оҕолор нууччалыы саҥарар буолан, оонньуулларыгар үксүгэр нууччалыы кэпсэтэллэр. Бүгүн оҕолорум бэркэ сынньаннылар, сахалыы сонун оонньуулары оонньоотубут. Магниттаах дуосканы биһирээтилэр, уолум сахалыы викторинаны интэриэһиргээтэ. Сонун, үчүгэй тэрээһин буолла. Эдэр ийэлэр тэрийбиттэрэ кэрэхсэбиллээх. Төрөөбүт тылбытыгар, норуоппутугар интэриэс улаатара үчүгэй. Тоҕо диэтэххэ, чахчы, проблема баар. Сорох ыал оҕолорун сахалыы иитиигэ болҕомтолорун уурбаттар. Оҕолоро нууччалыы саҥараллар, бэйэлэрин икки ардыларыгар сахалыы кэпсэтэллэр. Оҕолоро төрөөбүт тылларынан саҥарбат буоллахтарына, бэйэлэрэ тылларын илдьэ сылдьар бүтэһик көлүөнэ буолаллар. Дьон ону олох өйдөөбөт. Мин төһө кыалларынан, бу тэрээһин туһунан билэр дьоммор тарҕата сатаабытым”, — диэн икки оҕотун сиэтэ сылдьар юрист идэлээх төрөппүт Мария санаатын үллэһиннэ.

Тэрилтэлэр, сүрүннээн уһуйааннар чаас аҥаардыыта буола-буола оонньууларын уларытан истилэр. Саҥаттан-саҥа оонньуулар тахсан иһэр буолан, оҕолор да, төрөппүттэр даҕаны биһирээтилэр. Дьокуускай куорат “Мичээр” уһуйаанын эбии үөрэхтээһиҥҥэ уһуйааччыта Анна Захарова:

— Оҕолору “Мындыр өй” диэн сахалыы остуол оонньуутугар үөрэтэбин. Илиини-тарбаҕы эрчийиигэ оонньуурдары аҕалтаатым. Оҕону хабылыкка үөрэтиэх иннинэ, маҥнай куруппа арааһа кутуллубут мөһөөччүктэри хаба үөрэтэр ордук. Мөһөөччүгү оҕо илиитин кээмэйигэр сөп гына тигиллэр. “Эрийии”, “Туйаарыма Куо баттаҕын өр”, кылтан мээчик, хабылык, күөрчэх ытыйыы оонньууларын оҕолор сэҥээрэллэр. Оонньуу нөҥүө оҕо сайдар. Бэйэбит иитиллээччилэрбитин дьарыктаан, чөмпүйүөн буолаллар. Инникитин оҕо сыаллаах-соруктаах буола улаатар, — диэн кэпсиир.

Тэрээһин төһө даҕаны куораттан тэйиччи соҕус “Арассыыйа – мин устуоруйам” устуоруйа пааркатыгар буоллар, 1000 кэриҥэ киһи кэлэн барда диэн ааҕаллар. Кэрэхсэбиллээҕэ диэн, төрөппүттэр сэҥээрдилэр. Ийэ буолаары сылдьар кыргыттар элбэхтэр. Онтон сылыктаатахха, оҕолорун төрөөбүт тылынан иитиэхтэрин баҕарар төрөппүт баар, сахалыы иитии улахан суолталааҕын өйдүүр эбиттэр.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0