Үүнэр сыл РФ үтүөнү, кэрэни ис санаатыттан оҥорооччу уонна волонтер сыла. Саха сиригэр бу саҥа сылы көрсө үлэҕэ хардыы номнуо саҕаланна.
edersaas.ru
Дьокуускайдааҕы тулаайах уонна төрөппүт көрүүтэ-истиитэ суох хаалбыт оҕолорго аналлаах (коррекционнай) уопсай үөрэхтээһин оскуола-интэринээтигэр бүгүн ураты үөрүүлээх күн үүннэ. Кинилэргэ муусука биллиилээх диэйэтэлэ, Россия уонна СӨ үтүөлээх артыыһа А.П.Решетникова дириэктэрдээх Саха сирин норуоттарын муусукатын уонна фольклорун мусуойун кэлэктиибэ «Остуоруйата бэлэхтээ» диэн акция чэрчитинэн ыалдьыттаата.
Аан бастаан оҕолор болҕомтолорун ыалдьыттар “Таал-таал эмээхсин” уонна “Дьэгэ бааба” диэн куукуланан остуоруйалары көрдөрөн тартылар. Салгыы мусуой үлэһиттэрэ уонна кинилэри кытта куруук бииргэ сылдьар бэриниилээх волонтердара: «Айыы кыһатын» 4 кылааһыгар үөрэнэр Петя Сидоров, Дьокуускайдааҕы национальнай гимназия 1 кылааһын үөрэнээччитэ Айтал Громов уонна “Парус” оҕо саадын “Күнчээн” бөлөҕүн иитиллээччитэ биэс саастаах кырачаан Леон Сивцев Саҥа дьыл чугаһаабытынан истиҥник эҕэрдэлээн туран хомуска оонньоон иһитиннэрдилэр.
Ол кэннэ көрдөөх-нардаах оонньуулар тэрилиннилэр. Оҕолор сырсан, араас күрэхтэһиилэргэ кыттан тиритэн-хорутан, күлэн-үөрэн улаханнык астыннылар. Онтон бука барыларыгар дохсун ытыс тыаһыгар доҕуһуоллатан, үтүөнү баҕарар истиҥ эҕэрдэ тылынан арыаллатан Саҥа дьыллааҕы бэлэхтэр туттарылыннылар. Оҕолор барахсаттар үөрүүлэриттэн бэлэхтэрин хам туппутунан сүүрэн кэлэн мусуой үлэһиттэрин, волонтер оҕолору кууһа-кууһа, сыллыы-сыллыы махтаннылар. «Биһиэхэ маннык куруук кэлэ туруҥ. Эһигини кытта наһаа үчүгэй. Элбэх-элбэх остуоруйата көрдөрөөрүҥ. Аныгыскыга өссө уһуннук сылдьаарыҥ, оонньуохпут да оонньуохпут», — дэстилэр. Онтон кырачаан волонтердар саастыылаахтара наһаа үөрбүттэрин көрөннөр улаханнык долгуйдулар, уйадыйдылар. Бу оҕолор бары куруук үөрэ-көтө сылдьалларыгар, дьоллоох дьон буола улааталларыгар баҕардылар.
Мусуой наукаҕа үлэһитэ Мария Корнилова кэпсээбитинэн, бу интэринээт-оскуоланы кытта мусуой кэлэктиибэ бииргэ үлэлэһэргэ дуогабар түһэрсибиттэр. Ол чэрчитинэн, Олоҥхо декадатыгар сөп түбэһиннэрэн, оҕолор мусуойга ыалдьыттаабыттар, “Дьулуруйар Ньургун Боотур” мультипликационнай киинэни көрбүттэр. Мусуой кэлэктиибэ көрсүһүү, тэрээһин манан түмүктэммэтин, инникитин да былаан элбэҕин эттилэр.
Сардаана БАСНАЕВА, «Саха сирэ» хаһыат, edersaas.ru