Оҕону патриотическай тыыҥҥа иитиэхтээхпит

Ааптар: 
Бөлөххө киир:

Быйылгыттан уһуйаантан саҕалаан өрөспүүбүлүкэ үөрэҕин тэрилтэлэрэ бары иитии биир бырагырааматынан үлэлииллэр. РФ Үөрэҕириигэ министиэристибэтэ бырагыраама тутулун ыйан-кэрдэн биэрбитинэн, СӨ Үөрэҕин уонна билимин министиэристибэтэ атырдьах ыйыттан бэлэмнээн, иитии үлэтигэр эрэгийиэннээҕи компонены оҥорон бигэргэппит.

edersaas.ru

“Эркээйи” бырагырааманы бары ыстандаартка эппиэттиир гына саҥардыбыттар. Иитии бырагыраамата бары оскуолаларга ситиһиилээхтик киирэн үлэлээн эрэрин, быйыл хаһааҥҥытааҕар даҕаны оҕону, ыччаты патриоттуу тыыҥҥа иитиигэ улахан болҕомто уурулларын миниистир ыйда. Улуустар бэйэлэрин былааннарын оҥорбуттар. Ураты болҕомтону устуоруйа, обществознание уруоктарыгар, кылаас чаастарга уураллар. Бүгүн аан дойдуга буола турар бэлиитикэ балаһыанньатынан дойду министиэристибэтиттэн бэлэм матырыйааллаах, слайдалаах уруоктары ыыппыттар. СӨ үөрэҕин уонна билимин миниистирэ Ирина Любимова:

— Саамай сүрүнэ хас биирдии оҕоҕо, эдэр киһиэхэ дьиҥнээх иһитиннэриини тириэрдэхтээхпит. Манан сибээстээн устуоруйа уруогар, кылаас чааһыгар улахан болҕомтону уурабыт. “Взрослые разговоры о мире”, “Братцы слявянских народов”, “Гибридные войны”, “Лекции про фейковые новости”, “Герои нашего времени”, “Урок добровольчества”, “Информационные технологии”, о.д.а. уруоктары, лиэксийэлэри ыыттыбыт. Биһиэхэ ыыппыт матырыйаалларын таһынан, Саха сирин биллэр-көстөр учууталлара эмиэ бэйэлэрэ лиэксийэлэри, уруоктары оҥордулар.

Министиэристибэҕэ бэлитиическэй-иһитиннэрэр үлэ өрөспүүбүлүкэтээҕи ыстаабын тэрийдибит. Урут полит информационнай үлэ диэн баара, онуоха ханыылыы.  Ыстаап үлэтин миниистири бастакы солбуйааччы М.Ю. Присяжнай сүрүннүүр. Билигин олус элбэх олоҕо суох (фейк) иһитиннэрии тарҕанар. Ыстаап дьоҥҥо кырдьыктаах иһитиннэриини тиэрдиэхтээх. Киһи барыта хаһыаты, сурунаалы сурутар кыаҕа суох, хаачыстыбалаах интэриниэт да барыларыгар тиийбэт. Бассаабынан олоҕо суох иһитиннэрии тиийиитин дьон итэҕэйэр. Онон биһиги кырааматынай информационнай бэлиитикэни тиэрдиигэ көмөлөһүөхтээхпит. Саамай сүрүнэ ыччаты сөптөөх суолга сирдиэхтээхпит.

Иитии боппуруоһа олус киэҥ, биир тэрээһининэн, уруогунан түмүгү ситиһиллибэт. Патриотическай тыыҥҥа иитии дьиэ кэргэнтэн, оскуолаттан, улуус баһылыктара, тэрилтэлэр быһаччы бэйэлэрэ  кытталларыттан тутулуктаах. Нэһилиэктэн, улуустан дойдуларын туһугар бэриниилээх дьон иитиллэн тахсаллар, — диэн эттэ.

Людмила ПОПОВА, «Саха сирэ» хаһыат, edersaas.ru

Хаартыска: СИА.

+1
0
+1
0
+1
0
+1
0
+1
0
+1
0
+1
0