Дьокуускайга оскуола иннинээҕи альтеративнай үөрэхтээһин өрөспүүбүлүкэтээҕи бастакы конференцията ыытылынна.
edersaas.ru
Омук-омук аайы оҕону иитии араастаах. Дьоппуон оҕотун 5-гэр диэри тугу баҕарбытын оҥорор, тугу хааччахтаабат. Онтон биэһин туолла даҕаны кытаанах хонтуруолга киллэрэр. Кытайга төттөрүтүн, кыра эрдэхтэриттэн үлэҕэ, улахан дьоҥҥо убаастабыллаахтык сыһыаннаһарга үөрэтэллэр. Шведтар уонна американецтар оҕолоругар улахан киһиэхэ курдук сыһыаннаһаллар. Италияҕа дьиэ кэргэн культа ытыктанар. Бу дойдуга оҕо личность быһыытынан сайдарыгар көҥүлү биэрэллэр. Дэлэҕэ даҕаны Италияҕа оҕону иитиигэ араас методикалар төрүттэниэхтэрэ дуо? Монтессори көрүҥү ааһан, Саха сиригэр “Реджио” диэн саҥа альтернативнай үөрэхтээһин көрүҥэ саҥардыы тарҕанан эрэр.
Бу методиканы Дьокуускайдааҕы «Уу-чукучук» оҕо уһуйаана аан маҥнайгынан Саха сиригэр аҕалан, оҕолору Реджио методиканан иитэр. Бу саҥа көрүҥү атын уһуйааннарга билиһиннэрээри, бэйэлэрин уопуттарын атастаһаары «Уу-чукучук» уһуйаан уонна С.Н.Донской-II аатынан Үөрэх сайдыытын уонна квалификацияны үрдэтии института өрөспүүбүлүкэтээҕи бастакы онференцияҕа улуус уһуйааннарын иитээччилэрин, сэбиэдиссэйдэрин мустулар.
Олеся Тимофеева, «Уу-чукучук» уһуйаан сэбиэдиссэйэ:
— Биһиги уһуйааммыт уонча сыл үлэлээбитин тухары араас методиканы туһанан, боруобалаан кэллибит. Иитээччилэрбит куруук семинардарга, куурустарга үөрэнэллэр. Ол курдук сүрүн иитээччибит Римма Георгиевна наһаа үчүгэй методиканы истибитин, улаханнык сэҥээрбитин туһунан биһиэхэ кэпсээбитэ. Онуоха биһиги харахпыт умайан, маны туһаныахха, биһиги оҕолорбутугар бу табыгастаах буолуо диэн кыралаан бу ньыманан туһанан киирэн барбыппыт.
Римма Матвеева, “Реджио” методиканы туһанан үөрэтэр иитээччи:
— Реджио Эмилия диэн Италияҕа баар куорат аата. Манна Аҕа дойду иккис сэриитин кэнниттэн, дьон санаата саппаҕырбытын аһардаары, оҕолорбутун көҥүл санааҕа, бэйэлэрэ толкуйдуур, дьоҕурдаах, аһаҕас санаалаах дьон гына иитиэххэйиҥ диэн биир санааҕа кэлэннэр, бу методика толкуйдаммыт. Оҕоҕо аҥаардастыы мөҕө-этэ сылдьыбакка, кини толкуйдуур дьоҕурун сайыннарыахтаахпыт. Ол аата улахан киһи оҕоҕо чинчийэр, айар эйгэни тэрийиэхтээх, ыраахтан олорон ыйытан, ыйан-кэрдэн биэриэхтээх. Мин кэтээн көрүүбүнэн, бу методика оҕоҕо наһаа барсар, ордук саха оҕотугар. Ол эрээри, олоххо үчүгэйдик киирэригэр улахан киһи, төрөппүт, иитээччи санаата уларыйыан наада, кини философскайдык сыһыаннаһара ирдэниллэр. Биһиги оҕону наһаа хааччахтыыбыт, үөрэтиэхпитин эрэ баҕарабыт. Оттон Реджио методикаҕа араас оҥоһуктар, чинчийэр үлэлэр нөҥүө оҕо бэйэтин кыаҕа,толкуйдуур дьоҕура арыллыахтаах.
Конференцияҕа уонча куорат уһуйааннара, Намтан, Покровскайтан, Чурапчыттан, Амматтан, Уус Алдантан кэлэн уопут атастаһан, Реджио методиканы кытта билсэн тарҕастылар.
Мария Иванова, edersaas.ru