Бэҕэһээ сайтпытыгар «Ыттар оҕоҕо саба түстүлэр» диэн иһитиннэриибит бэчээттэммитэ. Онно сэтинньи 17 күнүгэр Нам улууһугар ыттар 8 саастаах кыыс оҕону ытырбыттарын туһунан суруйбуппут.
edersaas.ru
Бу чахчынан силиэстийэ уорганнара процессуальнай бэрэбиэркэ саҕалаабыттара.
РФ Силиэстийэлиир кэмитиэтин Саха сиринээҕи управлениета бүгүн иһитиннэрбитинэн, холуобунай дьыала тэриллибит. РФ Холуобунай кодексатын 118-с ыст. 1 чааһынан, ол эбэтэр, сэрэҕэ суохтан киһи доруобуйатыгар ыарахан эмсэҕэлээһини оҥоруу бэлиэтэ баарынан.
Бэҕэһээҥҥи иһитиннэриинэн, кыыс оскуолаттан киэһэ 20 чаас саҕана кэлэн испит диэн этэ.
Оттон бүгүҥҥү иһитиннэриинэн, оҕо оскуолаттан киэһэ 17.00 чаас саҕана кэлэн испит, онно Колхозная уулуссаҕа итинтэн чугас олорор ыаллар ыттара саба түспүттэр.
Сирэйин, илиилэрин, төбөтүн ытыттарбыт оҕо эрэйдээх дьиэтигэр тиийэн, тэлгэһэҕэ охтубутун убайа булбут.
Кыыс билигин Дьокуускай куорат балыыһатын ожоговай отделениетыгар ыарахан туруктаах сытар. Таһырдьа охтон, илиилэрин, төбөтүн үлүтээхтээбит.
Борокуратуура уорганнара бу дьыаланы хонтуруолга туталлар.
Силиэстийэ барар.
Биһиги корр., «Саха сирэ» хаһыат, edersaas.ru
Хаартыска: интэриниэттэн.