РФ Үөрэҕириигэ министиэристибэтин балаҕан ыйынааҕы бирикээһигэр олоҕуран, оҕону оскуолаҕа ылыыга кэккэ уларыйыылар киирбиттэрэ. Ханныктарый?
Дьокуускай куорат үөрэҕин управлениетын начаалынньыга Алексей Семенов иһитиннэрбитинэн, бастакытынан, сайабылыанньаны ылыы 2021 сыл муус устар 1 күнүттэн – бэс ыйын 30 күнүгэр диэри барар. Бу ыйыллыбыт болдьоххо олорор сирдэринэн сыһыарыллыбыт оскуолаларга (закрепленная территория) итиэннэ тустаах оскуолаҕа эдьиийдэрэ, убайдара үөрэнэр оҕолор төрөппүттэрэ сайабылыанньаны бириэхтэрин сөп. Бирикээһи үс күн иһигэр таһаарыахтаахтар.
Иккиһинэн, хаалбыт миэстэлэргэ тустаах оскуолаҕа олорор сирдэринэн хапсыбат дьонтон сайабылыанньаны от ыйын 6 күнүн кэнниттэн эрэ ылаллар.
Быйыл Дьокуускай куорат уокуругар 5000 кэриҥэ оҕо маҥнайгы кылааска киириэҕэ диэн суоттаналлар. Манна даҕатан эттэххэ, 182 кылаас арыллыахтааҕыттан, чааһынай оскуолалары учуоттаан туран, барыллаан, 52 сахалыы, 130 нууччалыы тыллаах кылааһы аһар былааннаахтарын иһитиннэрдэ.
Сайабылыанньаны СӨ үөрэҕин порталын https://edu.e-yakutia.ru нөҥүө эбэтэр оскуолаҕа миэстэтигэр тиийэн биэриэххэ сөп.
Людмила ПОПОВА, “Саха сирэ” хаһыат, edersaas.ru