Мэҥэ Хаҥаласка саха тылын уонна литературатын учууталларыгар аналлаах улуустааҕы сэминээр буолла. Сэминээргэ учууталлар уус-уран айымньынан оҕону иитии-үөрэтии тиэмэтигэр кэпсэттилэр. Бу туһунан биһиэхэ «Таммахтар» литературнай түмсүүнү салайар Августина Хабарова билиһиннэрдэ.
—Майаҕа Ф.Охлопков аатын сүгэр орто оскуола учууталлара, «Нооген: толкуйдуур, бырайыактыыр, дьоҕуру сайыннарар ньыма» тиэмэҕэ Любовь Докторова, «Литература уруоктарыгар наукалар алтыһыылара» — Наталия Пахомова, «Саха саарыннара» педагогическай мастарыскыай (электроннай босуобуйа) — Венера Птицына учуутал үлэтигэр олус көмөлөөх бэртээхэй маастар-кылаастары ыыттылар. Итини сэргэ, Төҥүлү оскуолатын саха тылыгар учуутала Марта Слепцова Марфа Куличкина поэзиятыгар аналлаах бэрт сэргэх уруок ис хоһоонун, араас дидактическай матырыйаалларын кытта билиһиннэрбитэ кэрэхсэбиллээх буолла. Учууталлар үлэлэрин үөрүйэҕин атастаһыылара, сонун көрүүлэрин билиһиннэриилэрэ олус сэргэхтик барда.
Томтор оскуолатын учуутала Валентина Эверстова маннык сэминээрдэргэ сылдьан, кыттан, бэйэ-бэйэни кытары ыкса билсэн, алтыһан, туора киһи үлэтин көрөн, истэн үлэҕэ бэрт элбэҕи туһаныахха сөбүн бэлиэтиир. Уруоктарыгар саҥаны-сонуну билбитин туттарга холонор баҕалааҕын этэр.
Тумул оскуолатын учуутала Анастасия Дагданча: — «Учуутал үөрэтэрин тухары учуутал» диэни бигэтик тутуһан кэллим. Киһи ордук эдэр сааһыгар үлэтигэр үөрүйэҕи иҥэринэр эбит. Аны туран, билбити-көрбүтү хайаан да атын учууталга тиэрдиэхтээхпит. Биһиги баай уопуттаах учууталларбытын сэргэ, эдэрдэри эмиэ истиэхпитин наада. Бүгүҥҥү сэминээр ис хоһооно киэҥ, олус туһалаах, — диэтэ, тэрийээччилэргэ махтанна.
Айталина Семенова (Бүтэйдээх) үөрэнээччини толкуйдатар, сэргэхситэр ньымалары көрбүттэрин, билбиттэрин, ону олус кэрэхсээбитин эттэ. Итиэннэ аны күһүн оскуолаларыгар маастар-кылааһы былааннаабытын иһитиннэрдэ.
Марта Слепцова (Төҥүлү) ханнык да сэминээртэн киһи кураанах төннүбэтин, хайаан да туһалааҕы булан ыларын эттэ. Баар матырыйааллары хардарыта атастаһан үлэлиир буоллахха, оҕоҕо билиини-көрүүнү иҥэрии таһыччы үрдүөҕэр эрэнэрин биллэрдэ.
Тамара Слободчикова (лиссиэй): —Айыыһыт ыйа түмүктэниитэ, Айыы кыргыттара, Ф.Охлопков аатынан оскуола улууска биллэр-көстөр үлэлээх учууталлара киэҥ ис хоһоонноох маастар-кылааһы көрдөрдүлэр. Бу таһымнаахтык ыытыллыбыта олус бэрт. Учууталларбыт сыллата саҥаттан-саҥа технологиялары баһылыыллара, үлэлэригэр харгыһа суох сонунтан-сонуну, саҥаны, кэрэхсэтэри, болҕомтону тардары тобуклан, булан, толкуйдаан саха тылын уруоктарыгар сатабыллаахтык туһаналлара хайҕаллаах, диэн чахчы да астынан, киэн туттан эттэ.
Бу курдук, сэминээри чахчы туһалаах буолла диэн учууталлар улаханнык астыммыттарын биллэрдилэр. Маны сэргэ, Хорообуттан, Быраматтан, Тиэлигиттэн, Мооруктан, уо.д.а. оскуолалартан саха тылын учууталлара «Учуутал айымньылаах аартыгынан» диэн төгүрүк остуол тула олорон инники үлэлэрин, соруктарын туһунан кэпсэттилэр. Оттон үөрэнээччилэр тэрээһиҥҥэ көхтөөх кыттыылара, билиилэрин көрдөрүүлэрэ, учууталларын кыһамньылаах үлэлэрин, билиини биэриилэрин өссө төгүл кэрэһилээтэ.