Биэнсийэҕэ тахсыах иннинээҕи саастаах дьон (предпенсионеры) оҕолоруттан уонна урукку кэргэннэриттэн алимент ирдиир бырааптаннылар. Госдуума маннык ис хоһоонноох сокуон барылын үһүс ааҕыытыгар ылынна.
Бу сокуон барылын Госдуума судаарыстыбаннай тутууга уонна сокуону оҥорууга кэмитиэтин салайааччы Павел Крашенинников толкуйдаабыт. Кини этэринэн, бу иннинэ үлэлээбэт, бэйэлэрин ииттинэр, көрүнэр кыахтара суох биэнсийэлээхтэр оҕолоруттан алимент көрдүүр бырааптаахтар этэ. Быйылгыттан реформа буолбутунан, биэнсийэҕэ тахсар саас үрдээбитинэн, маннык уларытыыны киллэрэр наадалаах диэн кини этэр.
Ону тэҥэ арахсыаххыт иннинэ, эбэтэр арахсыбыккыт кэннэ биир сыл буолаат, кыаммат, үлэлиир кыаҕа суох буолбут урукку кэргэниҥ эмиэ алимент көрдүөн сөп эбит. Ону ааһан, үлэлиир кыаҕа суох буолбут бииргэ төрөөбүттэр, эһэлэр-эбэлэр, сиэннэр, оннооҕор кииринньэҥ аҕалар, маачахалар кытта алимент көрдүүр бырааптаахтар.
Арассыыйаҕа дьахталлар 55, эр дьон 60 саастарыттан биэнсийэҕэ тахсыах иннинээҕи саастара саҕаланар. Оттон Саха сиригэр 5 сылынан эрдэлээн тахсаллар. 2 оҕону төрөппүт, иитэ ылбыт ийэ 50 сааһыгар биэнсийэҕэ тахсар. Оччотугар 45 сааһыгар үлэлиир кыаҕа суох буолан хааллаҕына, улааппыт, үлэлиир оҕолоруттан алимент көрдүүр бырааптанар эбит. Өскөтүн, ийэлэрин иитэртэн аккаастанар буоллахтарына.
Бу сокуон биэнсийэҕэ тахсыах иннинээҕи саастаах дьону өйөөһүн миэрэлэриттэн биирдэстэрэ буолар.
Ангелина ВАСИЛЬЕВА, “Саха сирэ” хаһыат, edersaas.ru
Хаартыска: интэриниэттэн