Хорсун дьон иэдээҥҥэ түбэспит дьону быыһыылларын өрүү истэбит. Олортон биирдэстэринэн бу сайын ууга түһэн эрэр уолу өрүһүйбүт «ОДьКХ» ГУП үлэһитэ Сергей Зырянов буолар. Бу туһунан коммунальнай хаһаайыстыба үлэһиттэрэ саҥа истэн соһуйбуттар.
Александр ТАРАСОВ, «Саха сирэ» хаһыат, https://edersaas.ru
Хаартыскаҕа Сергей Зырянов.
Сергей балыктыырын олус сөбүлүүр эбит. Куйаас сатыылаан турар кэмигэр кэргэниниин Покровскайга төрөппүттэригэр күүлэйдии тиийбиттэр. Бэс ыйын 24 күнүгэр быраата Вадимныын кэргэннэрин кытта Өлүөнэҕэ балыктыы киирбиттэр. Күөгүлэрин быраҕан балык тутарын кэтэһэ турбуттар. Кинилэртэн сүүсчэкэ миэтэрэ ыраах 12-13 саастаах икки уол оонньуу сылдьыбыттар. Эмискэ «быыһааҥ» диэн хаһыыны истибиттэр. Балыктыы турбут эр дьон сүүрэн тиийбиттэрэ, биир уол биирдэрин быыһыы сатыы сылдьар эбит. Сергей уһуну-киэҥи толкуйдуу барбакка, атаҕын таҥаһын устаат, ууга ыстаммыт. Биирдэрэ харбыыр буолан, улахан киһини көрөөт, биэрэги былдьаспыт. Иккис уол сатаан харбаабат буолан, ууга түһүмээри биир кэм булумахтана сылдьара. «Уол олус ыксаабыт, куттаммыт этэ. Өрүс дохсун сүүрүгүн утары киирсэн, сэниэтэ адьас эстэн эрэрэ. Билигин санаатахха, уу дириҥэ 3-4 м быһыылааҕа», – диэн Сергей кэпсиир. Кини уолга ыкса кэлбитигэр, анарааҥҥыта олус уолуйбут буолан, төттөрүтүн куота сатыыр курдук гыммыт.
«Уол олус эрэйдэммит, илистибит этэ. Аны бэйэм сылайан эрэр этим, уу сүүрүгэ олус дохсуна. Уол эмискэ мин диэки хайыспыта уонна кууһан ылбыта. Дьэ ону кытта биэрэги былдьаспытым», – диэн кэпсиир.
Кинилэр биэрэккэ тиийиэхтэригэр диэри хаста даҕаны ууга төбөлөрүнэн умсан ылбыттар. Сергей эмискэ атаҕа сири билээт, уолу биэрэк диэки үппүт уонна быраата Вадимҥа «Көмөлөс!» диэн хаһыытаат, сэниэтэ эстибит буолан, бэйэтэ уу анныгар барбыт. Вадим ууга ыстанаат, уолу таһаарбыт. «Олохпор саамай умнуллубат түгэн буолан ааспыта. Уолу өрүһүйэн баран, биэрэккэ сыккырыыр тыыным эрэ тиийбитэ», – диэн Сергей ол түгэни кэпсиир.
Хаартыскаҕа Вадим Степанов.
Уолаттар уоскуйан быыһааччыларыгар махтанаат, дьиэлэригэр сүүрбүттэр. Сарсыҥҥытыгар эр дьон оҕолор доруобуйалара аматын истэн олус үөрбүттэр. Оҕолор, аны мээнэ ууга киириэ суохпут диэн эрэннэрбиттэр.
Биһиги ортобутугар маннык хорсун санаалаах дьон баалларыттан киһи үөрэр. «ОДьКХ» ГУП профсойууһа оҕолору быыһаабыт дьоруойу анал наҕараадаҕа түһэрэри хайаан даҕаны туруорсуоҕа.