Дьокуускайга Ф.И.Авдеева аатынан оҕо дыбарыаһыгар мобильнай комплексы көрдөрдүлэр. Анал микрооптуобуска суолга-иискэ туруоруллар араас бэлиэлэр, үөрэтэр-такайар матырыйааллар бааллар.
СӨ Бырабыыталыстыба Бэрэссэдээтэлин солбуйааччытын э.т. Сергей Местников:
— «Лаборатория безопасности» федеральнай бырайыак чэрчитинэн, оҕолору суолга-иискэ сэрэхтээх буолалларыгар, быраабыланы тутуһалларыгар үөрэтэргэ-такайарга наадалаах, туһалаах тэриллэринэн, бэлиэлэринэн хааччыллыбыт анал микрооптуобус баар буолла. Маннык комплекстар атын эрэгийиэннэргэ үлэлииллэр, — диэтэ.
Госавтоиниспиэксийэ, СӨ Үөрэх министиэристибэтэ, суол-иис үлэһиттэрэ, уопсастыбаннай түмсүүлэр, өрөспүүбүлүкэтээҕи иһитиннэрэр-биллэрэр сириэстибэлэр көмөлөөн үлэлээһиннэринэн, өрөспүүбүлүкэҕэ оҕолор кыттыылаах суол-иис быһылаана аҕыйаабытын эттэ. «Лаборатория безопасности» көмөтүнэн оҕолору үөрэтии, такайыы улаатыа диэтэ.
Анал тэрилинэн хааччыллыбыт тиэхиньикэнэн улуустар оскуолаларыгар, оҕо кииннэригэр тиийэн кырачааннары, оскуола үөрэнээччилэрин суол быраабылаларыгар үөрэтиэхтэрэ, дьарыктары ыытыахтара.
Тэрээһин кыттыылаахтара маннык такайыы туһалаах буолуоҕун, оҕолор улаатан баран кэлин массыынаны ыыталларыгар суол быраабылатын билэр, тутуһар дьон буола улааталларыгар эрэнэллэрин биллэрдилэр.
СӨ Ил Дархан уонна Бырабыыталыстыба пресс-сулууспата
+1
+1
+1
+1
+1
+1
+1