Кэнники кэмҥэ хас да улууска оҕолору тиэйэн иһэр оптуобустар саахаллара буоллулар, ол иһин ити боппуруос суолтатын сүтэрбэт.
РФ Бырабыыталыстыбатын 1090 №-дээх уурааҕынан бигэргэммит «Суол быраабылатын» 1.2 пуунугар олоҕуран, аҕыс оҕолоох бөлөҕү төрөппүттэрэ уонна сокуонунан бэрэстэбиитэлэ суох оптуобуһунан таһыы (маршрутунан сылдьар оптуобустартан ураты) – оҕолору тэрээһиннээхтик таһыы диэн буолар.
Оҕолору тэрээһиннээхтик тиэйии туспа быраабылалардаах.
Ол курдук, айан түөрт чаастан ордук уһуур буоллаҕына, бөлөххө 7-лэрин туола илик оҕолор тиэйиллиэ суохтаахтар. Түүҥҥү бириэмэҕэ (киэһээ 23.00 чаастан сарсыарда 06.00 чааска диэри) сөмөлүөтүнэн көтүү буолбатах буоллаҕына, биитэр суол быһылаанын кытары сибээстээх хойутааһын суох буоллаҕына, оҕолору таһыы бобуллар.
Үстэн тахса опутуобус оҕолору таһарыгар булгуччу кинилэри ГИБДД массыыната арыаллыахтаах, онтон, биир-икки оптуобус айанныырыгар, ГИБДД арыаллааһына булгуччулаах буолбатах.
РФ Бырабыыталыстыбатын 1177 №-дээх уурааҕынан бигэргэммит “Оҕолору тэрээһиннээхтик таһыы быраабылатын” 10 пуунугар олоҕуран, оҕолору таһыах икки күн иннинэ салайааччы (оскуола дириэктэрэ, балыыһа кылаабынай бырааһа уонна да атыттар) олохтоох Госавтоинспекция салаатыгар оҕолору ханна эрэ бөлөҕүнэн илдьэрин туһунан суругунан иһиттиннэриэхтээх. Ону тутан, ГИБДД салаата бэйэтэ былааннаан, оптуобуһу арыаллыан сөп.
Онтон үс уонна үстэн элбэх оптуобус айанныыра былааннанар буоллаҕына, арыаллааһын сайаапката ГИБДД салаатыгар 10 күн иннинэ киириэхтээх.
Оҕолору таһарга булгуччу техническэй ирдэбиллэргэ эппиэттир оптуобус туттулуохтаах – туох да алдьаныыта суох, оҕолору саастарынан олоппоско тутар тэриллээх, тахографтаах уонна ГЛОНАСС биитэр ГЛОНАСС/GPS спутниковай систиэмэлээх.
Онтон быйыл от ыйын 1 күнүттэн оптуобус оҥоһуллубута уон сылтан тахсыа суохтаах уонна үрдүгэр араҕас биитэр сырдык саарыл өҥнөөх чаҕылыйар майаакчаан булгуччу баар буолуохтаахтар диэн саҥа ирдэбил күүһүгэр киирэр.
Оҕолору тиэйэр оптуобуһу ыытар суоппар “D” категориялаах быраабын ылбыта биир сыла ааспыт уонна биир сыл иһигэр суол сырыытыгар ыарахан административнай кэһиилэри оҥорботох буолуохтаах.
Ану туран оптуобуһа айан иннигэр көрүллүөхтээх, бэйэтэ быраас көрүүтүн эмиэ ааһыахтаах.
Эбиитин, 2018 сыл кулун тутар 18 күнүттэн суоппар уоту тэйитэр сурааһыннардаах куурканы биитэр тохтууругар сэлиэти булгуччу кэтиэхтээх.
Ити быраабылалары кэстэххэ, туох эппиэтинэс көрүллэрий?
Бастатан туран, РФ Административнай буруйдар тустарынан кодексатын 12.23-с ыстатыйата баар – оҕолору тэрээһиннээхтик тиэйэр туһунан быраабылалары кэһии. Эппиэтинэһэ 200 тыһ. солк. диэри ыстараапка тэҥнэһэр.
Ону тэҥэ, таһыы кэмигэр саахалтан дуу атын биричиинэттэн оҕолор эчэйдэхтэринэ, таһыыны тэрийээччи РФ Холуобунай куодексын 293 ыст. («Дьалаҕай быһыы») 7 сылга диэри болдьоххо көҥүлэ быһыллыан сөп.
Онтон суоппар РФ Холуобунай куодексын 238 ыст. («Куттал суох буолуутун ирдэбилигэр эппиэттэспэт өҥөнү оҥоруу») 10 сылга диэри болдьоххо көҥүлэ быһыллыан сөп.
Иван Ядреев, Чурапчы улууһун борокуруора.
Хаартыска: интэриниэттэн