Оҕолору эмтииргэ өссө эбии куойка арыллыаҕа

Бөлөххө киир:

Ил Дархан Айсен Николаев суһал ыстаап бүгүҥҥү мунньаҕар кэлиҥҥи икки нэдиэлэ иһигэр өрөспүүбүлүкэбитигэр элбэх оҕо дьаҥнаан эрэринэн быһыыны ылыыны түргэтэтэргэ эттэ. Билиҥҥи туругунан, Саха сиригэр уопсайа 820 оҕо дьаҥнаабыт.

Суһал ыстаап иһитиннэрбитинэн, бэҕэһээ суукка иһигэр 140 киһи дьаҥнаабыт. Ол иһигэр Дьокуускай куоракка 75 киһи. Ону сэргэ Алдаҥҥа, Мэҥэ Хаҥаласка, Мииринэйгэ, Нерюнгрига, Сунтаарга, Тааттаҕа, Уус Алдаҥҥа ыалдьыбыт дьон элбээбиттэр. Онон ааспыт нэдиэлэ түмүгүнэн ыалдьыбыт киһи ахсаана 4,7 % эбиллибит.

Мунньахха доруобуйа харыстабылын миниистирэ Елена Борисова Дьокуускайга оҕолор күүскэ ыалдьан эрэллэринэн, Сэллиги эмтиир оҕо балыыһатын баазатыгар  дьаҥнаабыттарга диэн туспа куойка аныырга эттэ. Кини этэринэн, ордук 11 саастарыгар диэри кыра оҕолор ыалдьыылара элбээбит. Кинилэр ыалдьыбыт оҕолор уопсай ахсааннарыттан 34 % ылаллар.

Ил Дархан Айсен Николаев үөрэх дьыла саҕаланан эрэринэн, быһыыны ылыыны күүһүрдэргэ эттэ.

– Билигин да өрөспүүбүлүкэбит үрдүнэн дьаҥнааһын көрдөрүүтэ бэрдэ суох. Онон бу хаалбыт кэмҥэ нэһилиэнньэ быһыыны ыларын түргэтитиэххэ. Ордук үөрэх эйгэтин, оҕо саадын үлэһиттэригэр тириэрдиэххэ, – диэн этэр кини.

Билигин өрөспүүбүлүкэ үрдүнэн быһыыны ылыы 69,15 % тэҥнэспит. Арассыыйа үрдүнэн быһыыны ылыыга 13 миэстэҕэ иһэбит. Атырдьах ыйын 16 күнүттэн өрөспүүбүлүкэ тэрилтэлэригэр быһыыны ылыыны бэрэбиэркэлиэхтэрэ. Ордук быһыыны ылыы көрдөрүүтэ намыһах улуустарыгар Үөһээ Бүлүүгэ, Намҥа, Нерюнгрига, Тааттаҕа, Чурапчыга бэрэбиэркэ күүһүрүөҕэ.

Аграфена КУЗЬМИНА, “Саха сирэ” хаһыат

+1
0
+1
0
+1
0
+1
0
+1
0
+1
0
+1
0