Бу күннэргэ социальнай ситимнэринэн Бүлүү куоратыгар дьэллик ыттар элбээбиттэрин туһунан иһитиннэрии тарҕаммыта. Бүлүү полициятыгар ыттар дьоҥҥо саба түһүүлэрин туһунан сайабылыанньалар бу сылтан саҕалаан киирэн барбыттар.
Оннук бастакы иһитиннэрии улуустааҕы киин балыыһаттан киирбит — 63 саастаах дьахтар ыттарга ытыттаран киирбит. Уопсайа итиннк 27 иһитиннэрии киирбититтэн, 20-тэ — балыыһаттан.
Сайабылыанньа биэрээччилэр бэлиэтииллэринэн, ыттар 10-15-тии буолан сылдьаллар эбит. Полиция бу чахчыларынан бэрэбиэркэ саҕалаабыт. СӨ ИДьМ-тын пресс-сулууспата иһитиннэрбитинэн, биир оннук түбэлтэҕэ полицейскай табельнай бэстилиэтин туттарга күһэллибит.
Ол курдук, биир полицейскай сулууспатын эбээһинэһин толорор кэмигэр Бүлүү куорат Октябрьскай уулуссатыгар икки оҕону ыттар төгүрүйэн, кырыктаахтык үрэ сылдьалларын түбэһэ көрбүт. Оҕолор барахсаттар уолуйан хаалан баран, төһө кыалларынан ыттары кыйдыы, көмүскэнэ тураахтыыллар эбит.
Бу участковай «Полиция туһунан» федеральнай сокуон 23-с ыстатыйатынан салайтаран, табельнай бэстилиэтин ылан, ордук кутталлаах ыттар диэки туһулаан ытан, үс ыты сууһарбыт. Ол туһунан тута дьуһуурунай чааска уонна борокуратуураҕа биллэрбит.
Олохтоох полиция Бүлүү куоратын муниципальнай сулууспаларыгар дьоҥҥо кутталлаах быһыы-майгы үөскээбит төрүөттэрин туоратарга диэн дьаһал сурук ыыппыт.
Оттон ыттарга түбэспит оҕолорун быыһаттарбыт төрөппүттэр участковайга ис сүрэхтэриттэн махтаммыттар.
Санатар буоллахха, 2014 сыллаахха Тиксиигэ 9 саастаах кыыс уонна Беркакитка 9 саастаах уол ыттар саба түһүүлэриттэн суорума суолламмыттара.
Биһиги корр., «Саха сирэ» хаһыат, edersaas.ru
Хаартыска: интэриниэттэн.