Оҕолорго баһаартан, халтараантан, чараас муустан сэрэхтээх буолууга куйаар ситиминэн уруок ыытылынна

Олоххо-дьаһахха оҕолорго куттал суох буолуутугар улахан болҕомто ууруллар, онно анаан өйдөтөр-сүбэлиир үлэлэр ыытыллаллар.

ЫБММ сүрүн управлениетын Саха сиринээҕи салаата иһитиннэрбитинэн,  управление үлэһиттэрэ уонна  быыһыыр сулууспа бэрэстэбиитэллэрэ кыттыһан, Дьокуускай куоракка оҕо-аймах дыбарыаһыгар оҕолорго анаан  куттал суох буолуутугар интерактивнай уруок ыыппыттар. Онуоха куттал суоһаабатын туһугар, эбэтэр соһуччу ыксаллаах быһыы-майгы үөскээн тахсар түгэнигэр тугу, хайдах гыныахха сөбүгэр өйдөтөр-сүбэлиир үлэ саҥа киэбинэн ыытыллыбыт.

Тэрээһин чэрчитинэн, оҕолорго баһаарынньык үлэтин туһунан кэпсээбиттэр. Оҕо испиискэни оонньуур курдук саныа суохтааҕын, оттон баһаар уота көр-нар буолбатаҕын өйдөтөргө бары кыһамньыларын, болҕомтолорун уурбуттар. «Гражданскай оборона» диэн тугун быһаарбыттар, бэйэни көмүскэнэр сириэстибэлэри көрдөрбүттэр. Дьиэҕэ кыраадыс алдьанан уртуут тоҕуннаҕына тугу гыныахтааххар тиийэ быһаарбыттар.

Сааскы кэм саҕаламмытынан, халтараантан сэрэтиини сэргэ, муус чарааһаан бардаҕына олус сэрэхтээх буолуу ирдэнэрин, муус уйбакка киһи ууга түстэҕинэ тугу гыныллыахтааҕын кэпсээбиттэр. Маны сэргэ, ГИМС иниспиэктэрдэрин үлэлэрин, ууга мониторинг хайдах оҥоһулларын, муус халыҥа хайдах мээрэйдэнэрин туһунан оҕолор сэргээн истибиттэр.

Куйаар ситиминэн СӨ быыһыыр сулууспа үлэһиттэрэ тымныы кэмҥэ киһи таһырдьа хайдах көрүнэн сылдьыахтааҕын, тымныыттан эмсэҕэлээбит киһиэхэ бастакы суһал көмөнү хайдах оҥоруохха сөбүн көрдөрбүттэр уонна суһал көмө сулууспаларын төлөпүөннэрин өйдөтөн-санатан биэрбиттэр.

Оҕо харысхаллаах, көмүскэллээх уонна сэрэхтээх буолуутун хааччыйыыга үлэ ыытыллар.