Роспотребнадзор оҕолорго маассабай тэрээһиннэри тэрийэри бобор

Ааптар: Эдэр Саас

05.07.2020

Бөлөххө киир:

Сыл бүтүөр диэри оҕолорго маассабай тэрээһиннэри тэрийэри Роспотребнадзор бопто.

Коронавирус дьаҥа олоххо-дьаһахха элбэх хааччахтааһыннары таһаарда. Пандемия кэмигэр, Роспотребнадзор оскуолаларга, оҕо саадтарыгар, лааҕырдарга санитарнай ирдэбиллэри олохтоото. Итинник ис хоһоонноох уураахха РФ кылаабынай санитарнай бырааһа Анна Попова илии баттаата итиэннэ бу докумуон быраабы иһитиннэрэр-биллэрэр официальнай интэриниэт-порталга таҕыста диэн sakha.gov.ru суруллар.

Саҥа ирдэбиллэр 2021 сыл тохсунньу 1 күнүгэр диэри дьайаллар. Манна оҕолору кытары үлэлиир бары тэрилтэлэр, маны сэргэ, доруобуйаны чэбдигирдэр лааҕырдар, эбии үөрэхтээһин тэрилтэлэрэ, атыы-эргиэн кииннэригэр, аэропортарга баар оҕо оонньуур хосторо, оҕо спортивнай тэрилтэлэрэ хабыллыбыттар.

Роспотребнадзор киллэрбит санитарнай быраабылаларыгар сөп түбэһиннэрэн:

Оҕо тэрилтэлэригэр атын бөлөхтөрү кытыннарыылаах күргүөмүнэн тэрээһиннэри ыытыы бобуллар. Лааҕырдарга маассабай тэрээһиннэр сибиэһэй салгыҥҥа уонна атын этэрээт оҕолорун кытары быһаччы хантаага суох эрэ буоллаҕына көҥүллэнэллэр.

Анал сурунаалга оҕолор уонна улахан дьон кыраадыстара мээрэйдэнэн баран, булгуччу бэлиэтэнэн, толоруллан иһиэхтээх.

Оскуолаларга хас биирдии кылаас тус-туһунан кабинеттаах буолуохтаах. Анал тэрили ирдиир кабинеттартан ураты, холобур, физкултуура, уруһуй, үлэ, физика, химия уруоктарыттан ураты, бары уруоктар кылаас тус кабинетыгар ыытыллаллар.

Аттестация ыытылларыгар 1,5 м социальнай дистанциялар тутуһуллуохтаахтар. Ол туһуттан үөрэнээччилэри паартаҕа соҕотохтуу уонна саахымат хараҕын курдук эрийэ-буруйа (зигзаг) олордуллуохтаах.

Оскуолаҕа киириэн иннинээҕи саастаах оҕолор эмиэ туспа бөлөхтөрүнэн дьарыктаналлар.

Оҕо саадтарыгар оонньуурдар күн ахсын дезинфекцияланыахтаахтар.

Тэрилтэҕэ, остолобуойга киирэргэ антисептиктар баар буолуохтаахтар.

Маны сэргэ, Роспотребнадзор Арктикческай зонаҕа олорооччулартан уратыларга, бу сыл бүтүөр диэри оҕолору атын эрэгийиэннэр лааҕырдарыгар сынньаталларын бопто. Москва, Санкт-Петербург, Севастополь оҕолоро куораттарын кытары быысаһар федеральнай таһымнаах эрэгийиэҥҥэ сынньаныахтарын сөп диэн РБК иһитиннэрэр.