Урбаанньыт оҕолор тустарынан «Эргиэн кэскилэ» диэн бастакы килбэчигэс сурунаал күн сирин көрдө.
edersaas.ru
“Эргиэн” өрөспүүбүлүкэтээҕи бизнес-оонньуу номнуо төрдүс сылын ыытыллан, оҕону бырайыак суруйарга үөрэтэртэн саҕалаан, оҕо бэйэтэ онорон таһаарбыт бородууксуйатын киэҥ сиргэ атыыга таһаарары ситистэ. Бородууксуйа хаачыстыбаны мэктиэлиирин докумуонунан бигэргэтэн, атыыга таһаарарга тустаах урбаанньыттары кытта дуогабардаһан, билигин куорат маҕаһыыннарыгар хамаҕатык атыылана турар.
«Эргиэн» бизнес-уопсастыбаны төрүттээччи Семен Посельскай урбаанньыт оҕолор бу уопуттарын кэпсиир, үөрэтэр соруктаах Николай Мординов-Амма Аччыгыйа аатынан «Кэскил» оҕо бэчээтин кыһатын кытта «Эргиэн кэскилэ» диэн сүрэхтээн, бастакы килбэчигэс сурунаалы таһаардылар.
Бу сурунаалга Саха сирин араас муннугар урбаан эйгэтигэр үлэлиир оҕолор тустарынан уонна оскуола оҕолорун бэйэ дьыалатын тэринэллэригэр аналлаах үөрэтэр матырыйааллар киирдилэр. Сурунаал сүрүн уратытынан Саха сирин ситиһиилээх урбаанньыттарыттан кейс-сорудахтар буолаллар. Хас биирдии сурунаал ааҕааччыта бэриллибит кейс-сорудахтары толордоҕуна, бырайыагар өйөбүл ылар кыахтанна.
Онон, бу сурунаал, Саха сирин оҕолоругар анаан, урбаан эйгэтин туһунан үөрэтэр уонна сырдатар бастакы контент буолар. Салгыы бу бырайыак Ютуб эйгэтигэр үлэтин саҕалыаҕа.
Сурунаал Дьокуускай куоракка «Книжный маркет» уонна «Горпечать» атыылыыр кииннэригэр атыыга таҕыста.
Социальнай ситимҥэ аадырыска суруттаран сонуннары булан ааҕыаххытын сөп: https://www.instagram.com/ergienkeskile/
Надежда ЕГОРОВА, “Саха сирэ” хаһыат, edersaas.ru