Саха сиригэр бэҕэһээҥҥиттэн ыла Оҕо дыбарыаһыгар үлэлиир Вакцина киинигэр (ВК) оҕолорго ковидтан харыстанар быһыыны биэрии саҕаланна.
СӨ Доруобуйа харыстабылын министиэристибэтэ иһитиннэрэринэн, быһыыны 12-17 саастаах, баҕалаах оҕолор ылыахтарын сөп.
Быһыы ылыан баҕалаахтар олорор сирдэринэн поликлиникаларын колл-кииннэригэр суруйтараллар. Онтон салҕыы Вакцина киинэ обургу оҕолору сайаапкаларынан көрөн бэйэтэ ыҥырар.
Ынырыллыбыт оҕолор страховкаҕа мэдиссиинискэй полистарын, СНИЛС, төрөөбүттэрин туһунан сибидиэтэлэстибэлэрин эбэтэр пааспардарын илдьэ кэлэллэр. 12-15 саастаахтар төрөппүттэрин илдьэ кэлиэхтээхтэр, онтон 15-17 бэйэлэрэ кэлиэхтэрин сөп.
Дойдуга кыра уонна обургу саастаах оҕолорго «Гам-КОВИД-ВакМ» («Спутник-М») (улахан дьон быһыытыттан биэс төгүл чэпчэтиллибит препарат) бэриллэр. «Спутник М» 2021 сыл сэтинньигэ регистрацияламмыт уонна Быһыылар национальнай халандаардарыгар киллэриллибит.
Оҕоҕо быһыы баҕалаах эрэ киһиэхэ бэриллэринэн, төрөппүттэртэн биирдэстэрин эбэтэр сокуоннай бэрэстэбиитэлин суругунан сөбүлэһиитинэн эрэ бэриллэр, оттон 15-17 саастаахтар сөбүлэҥи биэрэллэрин биэрбэттэрин бэйэлэрэ быһаарар бырааптаахтар.
Быһыы бэриллиэн иннинэ педиатр көрөрө, кыраадыһын кэмниирэ, эпидемиологическай анамнеһын чопчулуура булгуччулаах.
Киин субуотаттан уонна баскыһыанньаттан ураты күннэргэ 09 чаастан 16 чааска диэри үлэлиир.
Надежда ЕГОРОВА, «Саха сирэ», edersaas.ru