Саха сиригэр тохсунньу 26 күнүгэр оҕолорго коронавируснай инфекцияны утары бэриллэр “Спутник М” быһыы 720 устуука дуозата кэллэ. Оҕолорго быһыыны биэрии баҕа өттүнэн эрэ ыытыллыа.
Биир бастакынан мэдиссиинэ үлэһиттэрэ 12-17 саастаах оҕолоругар быһыыны биэрэргэ сөбүлэстилэр. Бу туһунан өрөспүүбүлүкэтээҕи суһал ыстаап салайааччытын солбуйааччы Ольга Балабкина брифинг кэмигэр иһитиннэрдэ.
“Роспотребнадзор” иһитиннэрбитинэн, кэнники кэмҥэ оҕолор “ковидынан” ыалдьаллара элбээтэ. Уһуйааннарга бөлөхтөр 10-15% туолан тураллар.
Ааспыт суукка иһигэр 1937 киһи, ол иһигэр Дьокуускайга 1491 киһи “ковидынан” ыалдьыбыта бигэргэннэ.
— Ыарыы олус сыстыганнаах буолан, олус түргэнник тарҕанар, ол эрэн, үгүстэр чэпчэкитик ыалдьаллар. Кэнники күннэргэ поликлиникаҕа көрдөрүнүү түһүмэхтэрин судургутарга үлэ барар. Бүгүҥҥүттэн ыла поликлиникалартан ураты, “Триумф” спорт киинигэр олоҕуран, амбулаторнай суһал көмө киинэ аһыллан, үлэтин саҕалаата. Манна тумуулаабыт сибикилээх, 38-тан үрдүгэ суох кыраадыстаах дьон кэлэн, көрдөрүнэн, босхо анаалыс туттарыахтарын сөп. Анаалыс түмүгэ 15 мүнүүтэнэн тута биллэр. Мантан атын түбэлтэлэргэ поликлиникаларга тиийиэххэ, эбэтэр, “Облачная поликлиника”, “Медсеть” сыһыарыылар нөҥүө, эбэтэр, 122 нүөмэринэн бырааһы дьиэҕэ ыҥырыахха наада, — диэн вице-премьер эттэ.
Тохсунньу 27 күнүнээҕи туругунан, өрөспүүбүлүкэҕэ коронавируһу утары быһыыны улахан дьон 79%-на ылбыт. Вакцинация салҕанар.
Ангелина Васильева, “Саха сирэ” хаһыат, edersaas.ru