Алина Санкт-Петербурдааҕы экэниэмикэ уонна үп университетын саҥардыы бүтэрэн кэлэр. Кыыс дойдутугар үлэлии сылдьан, Володялыын билсэр. Уоллаах кыыс икки ардыгар таптал кутаа уота умайар. Сайыҥҥы сылаас киэһэлэргэ сиэттиһэн хаамсыы, уһун түүннэргэ төлөпүөнүнэн кэпсэтии…
Бу билсиһэ сылдьар кэмнэригэр уол истиҥ баҕа санаатын, былааннарын кэпсиир. Владимир куорат киһитэ буола сылдьан, дэриэбинэҕэ сылгылары тутуон баҕарарын кыыска биллэрэр. Алина Володя баҕа санаатын өйөөн, ыал буолан баран, 2015 сыллаахха уол дойдутугар Чурапчы Дириҥэр бааза тутталлар…
Куоракка да олорон дьарыктаныахха сөп
Онон, Осиповтар эдэр дьиэ кэргэн сылгынан дьарыктаммыта биэс сылтан орто. Билигин уопсайа 108 төбөлөөхтөр, онтон тоҕуһа атыыр үөрэ. Дьокуускайга да олорон, Алина уонна Владимир аныгы кэмҥэ сөп түбэһиннэрэн, саха омук төрүт үгэһин – сыспай сиэллээҕи ииттэллэр. Чурапчыга эһээлэрэ Михаил Николаевич Осипов сылгылары көрөр-харайар.
Тааттаттан тардыылаах Алина «Алмаасэргиэнбааҥҥа» экэнэмииһинэн үлэлээбитэ онус сылыгар барбыт. Оттон Владимир сылгынан дьарыктанарын таһынан, саамай тымныы икки ыйга улахан массыынанан хоту улуустарга от, чох курдук социальнай суолталаах таһаҕастары таһар урбаанньыт. Эдэр ыал түөртээх уонна иккилээх оҕолоохтор, билигин үһүстэрин кэтэһэллэр.
Владимир куруук айылҕаҕа талаһар. Бултуурун-алтыырын, оттуурун сөбүлүүр. Аҕата Михаил Николаевич оҕолорун барыларын айылҕаҕа, булка-алка сыһыарбыта саарбаҕа суох. Онон, Володя куруук Дириҥҥэ баазатыгар эбэтэр ыраах айаннарга сылдьар. Осиповтар эһээлэригэр Михаил Николаевичка улахан махталларын тиэрдэллэр.
Сылгыны иитии – эппиэтинэстээх уонна ыарахан
Сорох дьон Дьөһөгөй оҕотун тутуу хороҕор муостааҕы ииппиккинээҕэр быдан чэпчэки, ынах кутуругун манаан олорор курдук буолбатах дииллэр. Осиповтар, сылгыны иитии – ыарахан биисинэс диэн этэллэр. Сылгыны иитэҥҥин, бары саныылларын курдук, харчыны үгүөрү баспаккын. Бастатан туран, тоҥон-хатан элбэҕи үлэлиэххэ наада. Иккиһинэн, ороскуота элбэх: уматыкка, араас тиэхиньикэҕэ, окко. Онон, сылгылары сөбүлүүр эрэ киһи дьарыктанар кыахтаах диэн Алина этэр. Эбиитин, кэнники кэмҥэ сылгы кыстыырыгар ыарахан дьыллар үүннүлэр.
Уолаттарбытыгар хаалыаҕа
Ыал ийэтэ этэринэн, аҕалара уолаттарын куруук айылҕаҕа сыһыара сатыыр эбит. Дириҥҥэ диэри кыһын үс чааһынан тиийэр эбиккин. Онон, биэриэмэ көһүннэр эрэ, өрөбүллэргэ Владимир дьиэ кэргэнин илдьэ Чурапчы диэки айанныыр. «Кэм-кэрдии түргэнник ааһар, оҕолорбут кыра да буолаллар, кинилэргэ сылгыларбыт хаалыахтара диэн санаалаах үлэлиибит-хамныыбыт”, — дииллэр Осиповтар.
«Аны ыраас чэбдик салгыҥҥа сылдьар, үлэлиир киһи быдан чэгиэн буолар эбит, эт-хаан өттүнэн сайдар», — диэн Владимир бэлиэтиир.
Үп-харчы, суоттааһын
Алина экэнэмиис идэлээх буолан, кэргэнин хаһаайыстыбатын сайдыытыгар былааны торумнуур. Ону таһынан, Чурапчыга баар буҕаалтыр үбү-харчыны ааҕар эбит.
Осиповтар аныгы кэм тэтиминэн хардыылаан иһэллэр. Холобур, былырыыҥҥы буойуна туһунан сокуоҥҥа баазаларын сөп түбэһиннэрэн үлэлии олороллор. Көмө харчыны ылан, бэйэлэрин баазаларыгар сүөһүнү астыыр сыах оҥостубуттара.
Эдьиий Дора «тыа сиригэр сылгыта, ынахта тутуҥ, аймахтаргытыгар харчыга да көрдөрүҥ” диэн куорат дьонугар туһулаан эппитин санаан кэллим. Сахалар былыр-былыргыттан илдьэ кэлбит төрүт үгэспит олохпут хаачыстыбата, доруобуйа тупсарыгар улахан төһүү күүс буолара саарбаҕа суох.