Электроннай тылдьыт туһунан санаатын Таатта улууһун Дьүлэй нэһилиэгин оскуолатын саха тылыгар уонна литературатыгар учуутала Вера Дмитриевна Павлова санаатын үллэһиннэ:
— Саха литературатын уруогар айымньы тылын-өһүн ырытыыга бэрт тургэнник, чэпчэкитик тыл суолтатын быһаара охсон, өйдөрүгэр-санааларыгар ылынан, оҕолор айымньы түгэх санаатыгар, толкуйугар дириҥник хорутан киирэллэригэр саҥа тахсыбыт » Сахалыы — нууччалыы» электроннай тылдьыт төһүү күүс буолла.
Бу «Сахалыы — нууччалыы» тылдьыт аныгы технологиянан оноһуллан тахсыбыта олус кэрэхсэбиллээх. Ол курдук, саҥа тылдьыт билигин информационнай технология балысханнык сайда турар кэмигэр тыл баайа хаҥыырыгар ананан оноһуллубута олус хайҕаллаах уонна махталлаах. Оҕо тыл суолтатын түргэнник быһаарарыгар, өйүгэр тутарыгар, олоххо тутта үөрэнэригэр туһуламмыт тылдьыт үтүө түмүктэрдээх буолуоҕар эрэнэбит. Күннээҕи олоххо дэбигис, судургутук туттар тылдьыттаммыппытыттан олус үөрдүбүт, астынныбыт. Маннык улахан үлэни оҥоруу үгүс сыраттан, дьаныардаах киэҥ далааһыннаах үлэттэн, улахан сатабылтан таҕыстаҕа. Махтал буоллун, ааптарга, Василий Васильевич Мигалкиҥҥа.
Бэчээккэ Ульяна Захарова бэлэмнээтэ.