Сарсын өрөспүүбүлүкэ киин куоратыгар өссө биир социальнай эбийиэк үөрүүлээх быһыыга-майгыга аһыллыаҕа.
Сарсыҥҥыттан Оҕо доруобуйатын чөлүгэр түһэрэр (реабилитационнай) киин үлэтин саҕалыаҕа. Ол туһунан СӨ Үлэҕэ уонна социальнай сайдыыга миниистирэ Александр Михеев иһитиннэрдэ. Сэргэлээх шоссетын 11 килэмиэтиригэр кэрэ айылҕалаах, чуумпу сиргэ олохсуйбут Киини үөрүүлээх аһыыга РФ Үлэҕэ уонна социальнай сайдыыга министиэристибэтиттэн, РФ Федерациятын сэбиэтиттэн, СӨ бырабыыталыстыбатыттан уо.д.а. министиэристибэлэртэн, биэдэмэстибэлэртэн ыалдьыттар кэлэллэрэ былааннанар.
Саҥа киин үлэлээтэҕинэ, өрөспүүбүлүкэ 3 тыһыынчаттан тахса инбэлиит уонна доруобуйаларыгар хааччахтаах оҕолоро сыл аайы доруобуйаларын көрдөрүнэр, эмтэнэр буолуохтара.
“Билигин өрөспүүбүлүкэҕэ 6 тыһыынчаттан тахса инбэлиит оҕо баар. Биһиги доруобуйаларын чөлүгэр түһэрэргэ наадыйар оҕолору барыларын хабар соруктаахпыт”, – диэн миниистир иһитиннэрдэ.
Урут билиһиннэрбиппит курдук, Киин хас да отделениелаах. Ол иһигэр, медико-социальнай чөлүгэр түһэрии, психологическай-педагогическай көмө, иһитиннэрэр-методическай киин уо.д.а. Доруобуйалрыгар хааччахтаах оҕолору иитэр дьиэ кэргэттэргэ көмөнү оҥорор туһуттан 100 куойка-миэстэлээх уопсай дьиэ үлэлиэҕэ.
2019 сылга диэри 3,5 тыһыынчаттан тахса оҕо киирэн эмтэннэҕинэ, доруобуйаларын тупсарарга наадыйар оҕолор бары хабыллалларыгар эрэл баар.
Надежда ЕГОРОВА, “Саха сирэ” хаһыат, edersaas.ru