Эдэр саас

Оҕолор уопсастыбаннай хамсааһыннарыгар үөрэнээччилэр көхтөөх кыттыыны ылаллар

Оҕолорго туһуламмыт хамсааһыннарга Саха сирин оҕолоро көхтөөхтүк кытталлар.

Оҕо уопсастыбаннай хамсааһынын иитинэн ыытыллар дэкээдэ тэрээһиннэригэр, улуустартан оҕолор турунан, бэлэмнэнэн, санаалара өрө көтөҕүллэн кытталлар.
Оҕолор сынньанар уонна доруобуйаларын чэбдигирдэр «Бэс чагда» диэн ааттанар кииннэригэр, бу күннэргэ, «Мин — лиидэрбин» симиэнэҕэ өрөспүүбүлүкэ оскуолаларын көхтөөх үөрэнээччилэрэ түмүстүлэр. Манна квиз «Quiz #DD», сөбүлүүр уопсастыбаннай түмсүүлэригэр анаан «Мое любимое детское общественное объединение» диэн видеонан роликтар куоталаһыылара, баһаатайдарга өрөспүүбүлүкэтээҕи күөн күрэс ыытылыннылар.
«Оҕолор уопсастыбаннай олоххо, үлэҕэ кыттыыларын өйүүр, дьоҕурдарын, кыахтарын сайыннарарга усулуобуйаны тэрийэр, толкуйдаабыт, тобулбут ураты бырайыактарын олоххо киллэрэллэригэр көмөлөһөр — бу биһиги сыалбыт-сорукпут. Кинилэр өйөбүл баарын билэллэрэ наада«, — диэн СӨ Ил Дархана Айсен Николаев санаатын үллэстэр.
Өрөспүүбүлүкэ үөрэнээччилэрэ оҕолорго анаммыт 783 уопсастыбаннай түмсүү үлэтигэр, Саха сирин 420 оскуолатыттан 130 тыһыынча оҕо Арассыыйа үөрэнээччилэрин хамсааһыннарын бырайыактарыгар кытталлара бэлиэтэнэр. Ол иһигэр 11,5 тыһ.оҕо волонтердарга уонна бэйэлэрин баҕаларынан көмөлөһөр этэрээттэргэ көхтөөх кыттыыны ылаллар.
Маны сэргэ, федеральнай таһымнаах Арассыыйа үөрэнээччилэрин хамсааһыннарын куонкурустарыгар, бырайыактарыгар ситиһиилэнэллэр. Бүтүн Арассыыйатааҕы «РДШ-территория самоуправления» бырайыакка Бүлүү улууһуттан «Горячие сердца» хамаанда «Мир глазами детей», Үөһээ Бүлүүттэн «Единение» хамаанда «Подвиг солдатских матерей» бырайыактарынан кыттаннар кыайыы көтөллөммүттэрэ. Эрэгийиэннээҕи отделениелар көҕүлээһиннэрин өйүүр Арассыыйатааҕы куонкуруска, сокуоннай саастарын ситэ илик оҕолор ортолоругар быраабы кэһиини тохтотор сыаллаах-соруктаах өйдөтүү үлэтин көҕүлээһиҥҥэ «Оҕолор-оҕолорго» үлэнэн Нам 1 №-дээх оскуолата бастыҥынан ааттаммыта. Ленскэй оройуонун Пеледуй оскуолатын үөрэнээччитэ Екатерина Синюкова «Открывая природу» Арассыыйаҕа ыытыллыбыт хаартысканан күрэскэ кыайыыны ылары ситиспитэ.  Өрөспүүбүлүкэҕэ дьоҕурдаах оҕолору өйүүргэ улахан болҕомто ууруллар буолан, Саха сирин үөрэнээччилэрэ Арассыыйатааҕы уонна норуоттар икки ардыларынааҕы күрэстэргэ, бэстибээллэргэ, олимпиадаларга кыайыыланаллар.
Наука, култуура, ускуустуба уонна успуорт хайысхаларыгар тыа сирдэригэр эдэр талааннары быһаарыыга, булууга быйыл национальнай бырайыак иитинэн үөрэтэр эспэдииссийэ  саҕаламмыта. Эспэдииссийэ мантан салгыы «Сириус» Арассыыйатааҕы үөрэтэр киин тиһигэр киирэр былааннаах. Саха сирин наукаҕа Аччыгый академиятын өйөбүлүнэн дьоҕурдаах оҕолор өрөспүүбүлүкэ уонна дойду бастыҥ үөрэтэр кииннэригэр стажировкаланаллар. Сыл ахсын «Инникигэ хардыы» кэмпириэнсийэҕэ кыттааччылар ахсааннара элбиир. Сыл саҥатыгар өрөспүүбүлүкэтээҕи түһүмэххэ бырайыактарын 1,7 тыһ. үөрэнээччи көмүскээбитэ.
Былырыын Саха сириттэн саҕаламмыт «Көр, бу Арассыыйа!» киэҥ далааһыннаммыт куйаар ситиминэн ыытыллар күөн күрэһи Арассыыйа 85 эрэгийиэнэ, «Россия — страна возможностей» платформа, «Сириус» үөрэтэр киин, нуучча географическай уопсастыбата, «Знание» Арассыыйатааҕы уопсастыба, уо.д.а. өйүүллэр. Былырыын күрэскэ дойду араас муннугуттан барыта 3,5 тыһ. хамаанда кыттыбыта. Быйыл күрэскэ кыттарга 3,6 тыһ. хамаандаттан сайаапка киирбитэ.
0
0
Telegram @edersaas20