Дьокуускайга А.Е.Кулаковскай аатынан норуоттар доҕордоһууларын дьиэтэ алтыс төгүлүн «Хотугу оонньуулар тыыннаах эньиэргийэлэрэ» бэстибээли тэрийэн ыытта.
Тэрээһин Дьокуускай куорат 26 №-дээх оскуолатыгар буолла. Маныаха 1 «В» кылаас талыллыбыта мээнэҕэ буолбатах диэн А.Е.Кулаковскай аатынан норуоттар доҕордоһууларын дьиэтин пресс-сулууспата бэлиэтиир. Евдокия Алексеева салайааччылаах кылаас эбэҥки тылын үөрэтэр диэн ыйыллар.
«Манна Хотугу норуоттар национальнай оонньууларыгар күрэхтэһэллэр, сымса, быһый, тулуурдаах, түргэн-тарҕан буолаллара ирдэнэр. Бэстибээли А.Е.Кулаковскай аатынан норуоттар доҕордоһууларын дьиэтэ, СӨ хотугу аҕыйах ахсааннаах төрүт олохтоох норуоттарын Ассоциацията тэрийдилэр.
Тэрээһин кыттыылаахтарын СӨ үөрэҕириитин үтүөлээх үлэһитэ, РФ үөрэҕириитин туйгуна, 26 №-дээх оскуолаҕа дириэктэри иитиигэ уонна социализацияҕа солбуйааччы Едисеева Вероника Николаевна эҕэрдэлээтэ.
Бастакы кылаас үөрэнээччилэрэ «Кираткар» («Орлята»), «Иргичиткар» («Волчата»), «Хомотыткар» («Медвежата») диэн хамаандаларга араҕыстылар. Үгэс буолбут бэйэ хамаандатын билиһиннэрии кэнниттэн, оҕолор салгыы наартаны ойдулар, эстэпиэтэлээтилэр, «Ноори», «Дьарҕааны хаптарыы» оонньуулары оонньоотулар.
Наартаны ойууга ахсаана хааччахтаммат, тохтоло суох ыстанан иһэллэр, наартаны таарыйыа суохтаахтар.
Ноори диэн 1 миэтэрэлээх мас ураҕас. Күрэхтэһээччи 1м*1м кыбадыраат иһигэр аҥаар атаҕар туран эрэ ураҕаһы илиитин уунан, ытыһыгар суулларбакка туруору тутан уһуннук туруохтаах. Өрө көтөҕөн турар атаҕын түһэриэ суохтаах уонна бэлиэтэммит сиртэн тахсыа суохтаах.
«Дьарҕааны хаптарыыга» уһун быаҕа балык макетын иилэллэр уонна ону күрэхтэһээччи атаҕынан таарыйыахтаах. Хас түһүмэх аайы балыгы 3-5 см өрө көтөҕөн үөһээ таһааран иһэллэр. Биир киһи хаалыар диэри күрэхтэһии салҕанар.
Итинтэн да атын күрэхтэһиилэр күүрээннээхтик ыытылыннылар.
Дьүүллүүр сүбэ бэрэссэдээтэлэ: Григорий Николаевич Христофоров, көҥүл тустууга ССРС спордун маастара,РСФСР икки төгүллээх чөмпүйүөнэ, үс төгүллээх призера, ССРС Кубогын хаһаайына, норуоттар икки ардыларынааҕы турнирдар чөмпүйүөннэрэ (Тбилиси, Италия, Афганистан, Алжир, Монголия), Өлөөн оройуонун бочуоттаах гражданина, РФ уонна СӨ профтехүөрэхтээһин туйгуна. Судьуйалар: Лонгинов Петр Спартакович, 26 №-дээх оскуола физкултуураҕа учуутала. Исаков Андрей Валентинович, СӨ эбэҥкилэр Ассоциацияларын I вице-бэрэсидьиэнэ. Кейметинов Спиридон Васильевич, СӨ аҕыйах ахсааннаах төрүт олохтоох хотугу норуоттар Ассоциацияларын ыччакка сэбиэтин чилиэнэ.
Күөн күрэс түмүгүнэн 1 миэстэни «Кираткар» хамаанда ылла, хамандыыр Артур Сосин. Иккис бириистээх миэстэҕэ «Хомотыткар» хамаанда (хамандыыр Аркадий Егоров) таҕыста. Үһүскэ «Иргичиткар» (хамандыыр Никита Дьяконов) хамаанда тигистэ.
Хотугу норуоттар оонньуулара оҕо чэгиэн, күүстээх-кыахтаах, түргэн-тарҕан, кыраҕы харахтаах, тобуллаҕас өйдөөх буола улаатарыгар көмөлөһөллөр. Күрэхтэһии өрүү буоларын курдук, бу да сырыыга өрө көтөҕүллүүлээхтик ыытылынна.