Арассыыйа култууратын министиэристибэтэ, «Яндекc» хампаанньа, «Бессмертный полк» хамсааһын уонна Арассыыйа бэтэрээннэрин сойууһа «Летопись сердца» диэн улахан аахсыйаны саҕалаатылар. Муус устар 30 күнүттэн оскуола үөрэнээччилэрэ сэрии бэтэрээннэригэр махтаналларын тиэрдэн, хоһоон ааҕан видеоҕа устан ыытыахтарын сөп.
edersaas.ru
Бырайыак кыттааччыларын ыыппыт видео-матырыйааллара ыам ыйын 9 күнүгэр “Яндекс.Эфир” трансляциятыгар көстүөҕэ. Устубут видеоларын үөрэнээччилэр letopisserdec@yandex.ru ааадырыска ыытыахтаахтар.
Ону сэргэ атын дьон болҕомтотун тардар сыалтан, ааптардар бэйэлэрин үлэлэрин социальнай ситимнэргэ #летописьсердец, #культурныймарафон уонна #культуровень хэштегтаах угуохтарын сөп.
Бырайыак усулуобуйатынан, аахсыйаҕа 1-11 кылаас үөрэнээччилэрэ кытталлар, байыаннай тиэмэҕэ сыһыаннаах хоһооннорун ааҕан, видео устуохтаахтар.
Кыттыы формата коронавируснай инфекция тарҕаныытынан сибээстээн, социальнай дистанцияны тутуһууну учуоттуур — кыттыы видеоролик устуута.
Эҕэрдэлээччилэр видеоларыгар бастаан хаһыс кылааска үөрэнэллэрин, олорор куораттарын ыйыахтаахтар, эҕэрдэ ананар киһитин бэлиэтиэхтээхтэр. Ону сэргэ хоһоон аатын, ааптарын ааттыахтаахтар.
Хоһоон ааҕыытын таһынан кыттааччы видеоролигар Аҕа дойду сэриитигэр кыттыбыт аймаҕын мэтириэтин көрдөрүөн сөп. Оччоҕо клип “Бессмертный полк” саайтыгар тахсыан сөп.
Видео 15 сөкүүндэттэн итэҕэһэ суох буолуохтаах уонна бириэмэтинэн 5 мүнүүтэттэн кылгас буолуо суохтаах. Ролик быһаарыыта 1280*720 пиксел эбэтэр онтон үрдүк буолуохтаах.
Видео эҕэрдэлэри ыам ыйын 8 күнүгэр диэри ханнык баҕарар файлообменникка (Яндекс.Диск, Google.Диск, Mail.Облако уо.д.а.) уган баран ыйыллыбыт аадырыска (letopisserdec@yandex.ru) ыытыахтаахтар. Суругунан эҕэрдэлээччи аатын-суолун, олорор куоратын, хоһоон аатын уонна ааптарын ыйыахтаахтар.
Егор Карпов, edersaas.ru