Уопсастыба

Оҕолор чыычаахтарга уйа оҥороллор

Дьокуускай куорат 17-с нүөмэрдээх оскуолатын 2 «Д» кылааһын оҕолоро чыычаахтарга анаан уйа арааһын оҥордулар.


Бу тэрээһин Арассыыйаҕа Экология, Саха сиригэр Үтүө санааланыы сылын чэрчитинэн ыытылынна. Тэрээһини Национальнай бибилэтиэкэ оҕоҕо уонна ыччакка киинэ уонна 2 «Д» кылаас салайааччыта Миронова Анна Григорьевна  тэрийдилэр.

Оҕолор билиилэрин хаҥатан, ойуур оҕолоро – чыычаахтар хайдах-туох олохтоохторун, тымныы тыйыс  кыһыны хайдах туоруохтарын сөбүн үөрэтэн, көрөн-билэн астыннылар, сэргээтилэр.

«Ааксыйаҕа 33 оҕо кытынна. Үөрэнээччилэр, төрөппүттэр бары болҕомтолорун ууран, ис сүрэхтэриттэн кыһаллан бэлэмнэммиттэр. Чыычаахха аналлаах араас көрүҥнээх үчүгэйкээн уйалары оҥорбуттара барыбытын улаханнык үөртэ. Бу үлэлэрин аҕалары көмөлөһүннэрэн «Орто Дойду» зоопаркаҕа ыйаатыбыт. Ону дьон-сэргэ олус биһирээтэ, хайҕаата.

Тэрээһиммит олус сэргэхтик, түмсүүлээхтик ааста. Оҕолор үөрүүлэрэ муҥура суох. Онон, түгэнинэн туһанан, бу тэрээһиммитигэр ис сүрэхтэриттэн үөрэн-көтөн туран кыттыбыт, көмөлөспүт, өйөбүл буолбут төрөппүттэрбитигэр уонна зоопарка кэлэктиибигэр улахан махталбытын тиэрдэбит.

Бу тэрээһиммит сылын аайы үгэс курдук ыытыллара буоллар, айылҕа уонна кыыллар харыстабылларыгар сүҥкэн күүстээх, туһалаах үлэ барыа эбит. Ону сэргэ, маннык үлэни тэрийии оҕо уонна төрөппүт бииргэ буолууларыгар, сыһыаны бөҕөргөтөргө улахан көмөлөөх буолара саарбахтаммат», — диэн санаатын ааксыйаны тэрийсибит, бииргэ үлэлэспит бибилэтиэкэр Варвара Исакова санаатын үллэһиннэ.

 

Национальнай бибилэтиэкэ оҕоҕо уонна ыччакка киинэ, Дьокуускай.

 

0
0

Добавить комментарий