Бу күннэргэ оскуолатааҕы бизнес-инкубатордар уонна агрооскуолалар үөрэнээччилэрэ оҥорон таhаарбыт бородууксуйалара Дьокуускай куорат атыы-эргиэн кииннэригэр атыыланан эрэллэр.
edersaas.ru
Биллэн турар, бу дьыала олоххо киириитигэр үгүс кэпсэтии, сүүрүү-көтүү наадата чахчы.
— Икки сыл устата улуустары кэрийэн, үөрэтэн, ыытан кэлбит үлэм чэрчитинэн оҕону урбаан эйэгэтигэр сыhыаран, үлэлии сылдьар үөрэнээччилэр бородууксуйаларын хаҥатар соруктаах бу саҥа сүүрээни толкуйдаабытым. Кулун тутарга Мэнэ Хаҥалас улууhун В.П. Ларионов аатынан Майа орто оскуолатын үөрэнээччилэрэ оҥорон таhаарбыт отон барыанньалара «Сахаагропродукт» атыы-эргиэн тэрилтэтин маҕаһыыннарыгар атыыга тахсан дьон биhирэбилин ылбыта.
Салгыы бу хамсааhыҥҥа олохтоох оҥорон таhаарыынан дьарыктанан тас дойдуларга биллибит Ньургуйаана Заморщикова салайааччылаах «Саха-чэй» тэрилтэ, сахалыы иhит-хомуос оҥоруутунан дьарыктанар «Көмүлүөк» атыы-эргиэн ситимнэрэ, миэбэл оҥоруутунан дьарыктанар эдэр урбаанньыт Василий Данилов «Marselle» маҕааhыыннарыгар оҕолор бородууксуйалара атыыга таҕыста.
Бырайыак бастакы хараҥаччыларынан Мэҥэ Ханалас улууhун В.П. Ларионов аатынан Майа, Таатта улууhуттан — Чымнаайы, Нам улууhун 1-кы Хомустааҕын уонна саамай ыраах сытар Эбээн Бытантай улууhун Кустуур орто оскуолатын үөрэнээччилэрэ буолаллар.
Оҕолор бородууксуйаларын сүрүн көрүҥэ — бэлэххэ аналлаах оӊоhуктар: дьиэ ыраастыырга аналлаах от, харысхал, олбох, киэргэл, кыбытык, бэйэ кутуу мыылата, эмтээх от сыттаах сыттык, сувенир, сахалыы иhит-хомуос.
Урбаан суолтатын оҕоҕо өйдөтөр сыаллаах 2016 сыллаахха Үөрэх министиэристибэтин өйөбүлүнэн «Эргиэн» бизнес-оонньууну тэрийииттэн саҕалаабыппыт. Онно хамаанданан үлэ сүнньүнэн икки чаас иһигэр бырайыак толкуйдуурга уонна хамыыhыйа иннигэр кэпсииргэ, көмүскүүргэ үөрэппиппит.
Салгыы бу оҕолорбутун «Бэс Чагда» өрөспүүбүлүкэтээҕи оҕо сынньалаҥ киинигэр 15 улуустан түмэн, урбааҥҥа аналлаах смена тэрийбиппит. Манна оҕо оҕоттон үөрэнэр, сайдар, алтыhар. Онтон дойдутугар тиийээт, бэйэтин сонун көрүүлэрин олоххо киллэрэргэ дьулуһар, — диэн кэпсиир «Эргиэн» бизнес-түмсүү төрүттээччитэ Семен Посельскай.
«Эргиэн» бизнес-түмсүү педагогтара оҕо бэйэ дьыалатын саҕалыырыгар методическай уонна практическай көмөнү ыларыгар учууталлары бэлэмниир анал куурустары тэрийэн үлэлэппиттэрэ икки сыл буолла. Кууруhу ыытарга улууска тахсан сирин-уотун, оскуола материальнай-техническэй базатын үөрэтэн, оҕо сатабылыгар тирэҕирэн, киниэхэ табыгастаах урбаан моделыгар ыкса ылсан үлэлэһэрин хааччыйаллар.
— Хас биирдии улуус, нэһилиэк, оскуола, оҕо бэйэтигэр табыгастаах уонна тустаах дьыаланан дьарыктанарыгар сөптөөх эйгэни тэрийэбит. Этэргэ дылы, үөрэх бырагырааматыгар уонна кинигэҕэ суруллубут уопсай сүнньүнэн буолан тыа сиригэр урбааны саҕалыырга ыарахаттардааҕын өйдөөммүт, ону кыайарга үлэни ыытан, син сүнньүн таптыбыт дии саныыбын. Оҕо урбааны оскуола дьаарбаҥкатыгар эрэ ыытыллар атыы-тутуу түгэнин курдук өйдүүр. Урбаан боппуруоһугар сыhыаны оҕо оскуола сылдьыаҕыттан тосту уларытар уонна үүнэр көлүөнэ ыччакка бу салаа туһунан дьоhун көрүүнү олохтуур сыалтан, эдэр урбаанньыттар оҥорон таһаарбыт табаардарын батарыы ньыматын киллэрдибит. Бу — чиэски сиргэ турар, аҕыйах нэhилиэнньэлээх нэһилиэккэ табаары батарыыга уустук балаһыанньаны үөрэтэн көрүү хайысхата. Бу хамсааhыҥҥа олохтоох оҥорон таhаарынан дьарыктанар эрэ урбаанньыттары кытта үлэлэhэбит. Онон оҕолорбут оҥоhуктара, бородууксуйалара атыыланар сирдэрин бэлиэҕэ ылаарыҥ, — диэн салгыы кэпсиир Семен Посельскай.
«Эргиэн» бизнес-түмсүү төрүттээччитэ бэлиэтииринэн, былырыыҥҥыттан педагогическай дьаарбаҥка чэрчитинэн сыл устата ситиhиилээхтик үлэлээбит оҕолору уонна кинилэр үлэлэрин тэрийэргэ көмө, өйөбүл буолар учууталлары «Эргиэн» диэн ааттаах анал бэлиэнэн наҕараадалыыллар. Онон быйылгы анал бэлиэ хаһаайынынан ким буоларын оҕолор да, учууталлар да долгуйа кэтэһэллэр.
«Эргиэн» бизнес-түмсүү сыл аайы оҕо урбаанын хайысхатын сайыннарыыга, сонун бырайыактары киллэриигэ туһуламмыт үлэтин тэтимирдэн иһэр. Ол курдук, самаан сайыны көрсө өрөспүүбүлүкэтээҕи «Кэскил» оҕо бэчээтин кыһатын кытта бииргэ үлэлээһиҥҥэ илии баттастылар. Оҕоҕо урбаан кистэлэҥнэрин, сонун хайысхаларын кэпсиир уонна үөрэтэр сыаллаах «Эргиэн» диэн ааттаах глянцевай сурунаал таhааран эрэллэр. Онон оҕону урбаан салаатыгар көҕүлүүр уопсастыбаннай тэрилтэ үлэтин түмүгэ аны бэчээккэ уонна сурунаалга киэҥник сырдатыллыаҕа.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Семен Посельскай түһэриитэ.