Кэлин технология күүскэ сайдан, дьон илиитинэн толорор үлэтин барытын өйдөөх технологиялар, роботтар толоруохтара дэһэллэр. Оччоҕо дьон тугунан дьарыктанар? Ханнык идэлэр ирдэниэхтэрэй? Киһи роботтары кытта күрэстэһэр кыахтаах дуо?
Ити ыйытыыларга хоруйдары аҕыйах хонугунан норуоттар икки ардыларынааҕы Интеллектуальнай оонньуулар чэрчилэринэн ыытыллыахтаах Global Conference үөрэнээччилэр кэмпириэнсийэлэригэр кэпсэтиэхтэрэ. Ити — Оонньуу биир тэрээһининэн буолар. Чахчы интэриэһинэй. “Биһиги төрдүс бырамыысыланнай өрөбөлүүссүйэ кэмигэр олоробут. Кэлин дьон биһиги бэйэ-бэйэбитин кытта күрэстэһэрбитин курдук буолбакка, роботтары кытта тэҥҥэ куоталаһыахтара. Оҥорон таһаарыы өҥөтө автоматизацияҕа кубулуйан эрэр. Маныаха киһи оруола кыччаан иһэр. Итиниэхэ оҕолор инникилэрин хайдах толкуйдуулларын туһунан бу кэмпириэнсийэ кэмигэр ырытыһыахтара”, — диэн тэрийээччи, СӨ Ил Дарханын Үрдүкү оскуолатын проректора Майя Курнева этэр.
Оттон тэрийээччи, СӨ эдэр экэнэмиистэрин ассоциациятын бэрэстэбиитэлэ Татьяна Тарасова: “Оннооҕор билигин, пааспар оҥоттороору гыннахпытына уһун күнү быһа уочаракка олорбоппут. Судаарыстыбаннай өҥө көмөтүнэн сайаапкабытын ыытабыт. Эбэтэр ханна эмэ сынньана барар былааннаах буоллахпытына билиэппитин, түһэр сирбитин эрдэттэн төлөпүөн анал сыһыарыытын нөҥүө үлэһэбит. Технология олус күүскэ сайдар. Оннооҕор аны 20-30 сылынан чопчу маннык буолуо диэн этэр кыаллыбат. Оччоҕо киһи туох оруоллаах буолуон сөбүн туһунан үөрэнээччилэр кэпсэтиэхтэрэ”, — диэн судургу холобурдарынан быһаарар.
Кэмпириэнсийэни хал буолбут дакылааттарынан хадаҕалаабакка, экспертэри олордубакка, букатын аныгылыы тэрийэр санаалаахтар. Ол курдук, уопсайа, сэттэ сиэксийэнэн 120 оҕо кыттара биллэр. Кинилэргэ тас дойдуттан эмиэ оҕолор кыттыаһыахтара. Быһатын эттэххэ, бүгүҥҥү оскуола оҕолоро кэлэр кэми ырыҥалыахтара. Кэпсэтии барыта англия тылынан итиэннэ оонньуу быһыытынан барыаҕа. Тэрээһини ыытарга анаан-минээн биллэр-көстөр оонньуу маастарын Анатолий Казакову ыҥырбыттар.
Сиэксийэлэр:
-Медицинэ
-Үөрэх
-Тыа хаһаайыстыбата и бырамыысыланнас
-Өйдөөх дьиэ
-Өйдөөх куораттар
-Электроннай судаарыстыба
-Баан систиэмэтэ
Людмила ПОПОВА, “Саха сирэ” хаһыат, edersaas.ru