Дьокуускай куоракка итирик суоппар улахан алдьархайы таһаара сыста. Үөһээҥҥи күүстэр араҥаччылаан буолуо, буруйдаах да суоппар, оҕо да тыыннаах хаалбыттар.
Ол курдук, СӨ ИДьМ-тын ГИБДД пропагандаҕа отдела иһитиннэрбитинэн, бэҕэһээ, олунньу 26 күнүгэр, түүн 23.00 чаас саҕана Госавтоинспекция дьуһуурунай чааһыгар биир дьахтартан иһитиннэрии киирбит. Жорницкай уулуссатын 12 №-дээх дьиэтин таһыттан кини «Тойота Камри» массыынатын күрэппиттэрин туһунан. Аймаммыт дьахтар кэпсээбитинэн, массыынатыгар кэлин олбоххо сокуоннай сааһын ситэ илик уол оҕото утуйа сыппыт.
Бары патрулларга тутатына «Перехват» былаан биллэриллибит. Сотору буолан баран, ориентировкаҕа сөп түбэһэр массыына Дзержинскэй-Строителей уулуссалар быһа охсуһууларыгар суол быһылааныгар түбэспитин туһунан иһитиннэрии киирбит.
Быһылаан буолбут сиригэр кэлбит «суһал көмө» биригээдэтэ бу 14 саастаах оҕо төбөтө эчэйбитин балыыһаҕа илдьибит. Оттон суоппар түөһүн уҥуоҕа тостубут.
Барыллаан быһаарыынан, бу ханна да үлэлээбэт, урут холуобунай да, административнай да эппиэтинэскэ тардылла сылдьыбатах 28 саастаах киһи дьахтар массыынатын аанын хатаабатаҕынан туһанан күрэппит. Уонна харах тэстэринэн түргэнник айаннаан иһэн, светофорга баран түспүт.
Көрдөххө, лаппа итирик туруктаах эрээри, медосвидетельствование барартан аккаастаммыт. Массыына ыытар быраабын былырыын тохсунньуга ылбыт.
Бу чахчынан РФ Холуобунай кодексатын 166-с ыст. 1 чааһынан, ол эбэтэр, массыынаны күрэтиигэ, холуобунай дьыала тэриллибит.
Биһиги корр., «Саха сирэ» хаһыат, edersaas.ru
Хаартыскалар: СӨ ИДьМ-тын ГИБДД пропагандаҕа отдела.