Оҕоҕутун соҕотохтуу хаалларымаҥ!

Бөлөххө киир:

Дойду үрдүнэн сылын аайы тыһыынчанан оҕо түннүктэн сууллан өлөр биитэр улаханнык эчэйэр.

Халлаан сылыйда да, түннүктэри, форточкалары аһан кэбиһэбит. Оннук хоско хаамар, онно-манна ыттар буолбут оҕону кыл да түгэҥҥэ соҕотохтуу хаалларан тахсыы ыарахан содуллаах буолуон сөп.

Биһиги өрөспүүбүлүкэбитигэр, хомойуох иһин, номнуо итинник икки быһылаан таҕыста. Ол курдук, от ыйын 5 күнүгэр Нерюнгри куоракка 3 саастаах уолчаан иккис этээс түннүгүттэн сууллубута. Ийэтэ куукунаҕа ас астыыр кэмигэр кини аттынааҕы хоско оонньуу сылдьыбыт. Сотору буолан баран, ийэ хоско тыас-уус буолбутун истэн, ойон киирбитэ – форточка аһаҕас, оттон уолчаана дьиэ бетон акылаатыгар сытаахтыыр эбит. Саатар төбөтүнэн түһээхтээбит. Оҕо эрэйдээх от ыйын 12 күнүгэр балыыһаҕа сытан өлөөхтөөбүт.

Иккис түбэлтэ Өймөкөөҥҥө буолла. От ыйын 14 күнүгэр Уус Ньараҕа ийэ 4 саастаах уолчаанын оскуолаҕа үөрэнэр оҕотугар көрдөрө хаалларан баран, маҕаһыыҥҥа тахсыбыт. Ол кэмҥэ кыра уол үһүс этээс түннүгүттэн сууллубут. Ыарахан туруктаах оҕону анал санрейсинэн Дьокуускайга аҕалбыттар.

Маннык быһылааннар туохтан сылтаан тахсалларын силиэстийэ уорганнара ырытан-үөрэтэн көрөн баран, пластиковай түннүктэр аһыллалларын харгыстыыр анал сомуоктары туруоруохха наада диэн быһаарбыттар. Бу этиилэрэ өйөбүлү ылан, быйыл балаҕан ыйын 1 күнүттэн олоххо киириэхтээх. Ити уларытыыларга олоҕуран, дьиэлэргэ эрэ буолбакка, оҕо тэрилтэлэригэр эмиэ, түннүктэргэ анал сомуоктар туруоруллуохтаахтар.

Вера МАКАРОВА

+1
0
+1
0
+1
0
+1
0
+1
0
+1
0
+1
0