СӨ Успорт министиэристибэтэ соторутааҕыта куйаар ситиминэн өрөспүүбүлүкэҕэ сэминээр тэрийдэ. Сэминээргэ сүрүн болҕомто спортивнай эрэллэри бэлэмнээн таһаарыы үлэтигэр («Аспекты подготовки спортивного резерва региона) уурулунна.
СӨ Үөрэх уонна наука миниистирэ Михаил Сивцев, Ыччат дьыалатыгар, физкултуураҕа уонна успуорка СӨ судаарыстыбаннай мунньаҕын бастайааннай кэмитиэтин бэрэссэдээтэлэ Михаил Гуляев кытыннылар диэн В.Посельскай тустаах министиэристибэ саайтыгар суруйар.
Куйаар ситиминэн өрөспүүбүлүкэ улуустарыттан тириэньэрдэр, исписэлиистэр, салайааччылар, преподавателлэр, инструктор-методистар, успуорт оскуолатыгар, училищеҕа үлэлиир исписэлиистэр, орто анал уонна үрдүк үөрэх кыһаларыттан бэрэстэбиитэллэр, барыта 478 киһи кыттыбыт.
Сэминээри СӨ Успуорт миниистирин I солбуйааччы Семен Чердонов, «РЦПСР» ГБТ дириэктэрин э.т. Василий Егоров иилээн-саҕалаан ыыппыттар. Семен Чердонов физкултуура-успуорт үлэтин билиһиннэрбит. Өрөспүүбүлүкэҕэ спорт эйгэтигэр оҕоҕо-эдэр ыччакка 65 тэрилтэ, ол иһигэр олимпийскай эрэллэри бэлэмниир успуорт 8 оскуолата, олимпийскай эрэллэри бэлэмниир биир муниципальнай спортивнай оскуола, үс судаарыстыбаннай спортивнай оскуола, улуустарга 53 ДЮСШ баарын иһитиннэрбит. Манна барытыгар уопсайа 36 042 эдэр спортсмен дьарыктанар. 2020 сылга хоруона хамсыга төһө да харгыстары үөскэппитин иһин, Уһук Илин федеральнай уокурук, Арассыыйа, Европа, Аан дойду күрэхтэһиилэригэр кыттан, спортсмен кыргыттар, уолаттар сүүмэрдэммит өрөспүүбүлүкэтээҕи хамаандалара 278 мэтээли, 78 кыһыл, 82 үрүҥ, 118 боруонса мэтээллэри ылбыттар.
«РЦ ПСР» дириэктэрин солбуйааччы Аграфена Колесова «Детский спорт – фундамент будущего!» диэн соторутааҕыта тахсыбыт хомуурунньугунан » Анализ развития детско-юношеского спорта и подготовки спортивного резерва РС (Я)» дакылаата болҕомтону тардыбыт. Улахан уопуттаах салайааччы өрөспүүбүлүкэҕэ оҕо успуордун сайдыытын устуоруйатын уонна ситиһиилэри, дьоҕурдаах оҕолору кытары үлэ, успуорт көрүҥнэригэр өрөспүүбүлүкэҕэ анал спортивнай оскуолалары тэрийии суолтатын, Саха сиригэр оҕо-ыччат успуордун сайдыытын кэскилин туһунан сырдаппыт.
РФ Успуорт министиэристибэтин «спортивнай эрэллэри бэлэмнээһиҥҥэ федеральнай киин» отделын начаалынньыга, п.н.к. Баир Найданов РФ субъектарыгар физкултуура уонна успуорт эйгэтигэр экспериментальнай (инновационнай) үлэни тэрийии уратыларын сырдатарыгар, Чурапчыга олимпийскай эрэллэри бэлэмниир оҕо-ыччат өрөспүүбүлүкэтээҕи анал спортивнай оскуола уонна спортивнай эрэллэри бэлэмниир өрөспүүбүлүкэтээҕи киин (РСДЮСШОР уонна РЦ ПСР РС (Я) бастыҥнарынан буолалларын бэлиэтээбит. Арассыыйаҕа оҕо-эдэр ыччат успуорка оскуолаларыгар экспериментальнай былаһааккаларга холобур буолаллар диэн эппит.
М.К.Аммосов аатынан ХИФУ физкултуураҕа уонна успуорка институтун педагогическай психологияҕа кафедратын сэбиэдиссэйэ Василий Находкин «Социально-психологические аспекты занятия физической культурой и спортом подростков в условиях пандемии», «Республиканский центр лечебной физкультуры и спортивной медицины» спортивнай мэдиссиинэ отделениетын сэбиэдиссэйэ Анна Иванова эдэр спортсменнары медико-биологическай арыаллааһын туһунан, Хаҥалас улууһуттан Порковскайтан ДЮСШ дириэктэрин солбуйааччы Анна Стасова-Алексеева «Организация учебно-методической работы в учреждениях дополнительного образования в области физической культуры и спорта на примере Хангаласской ДЮСШ» дакылааттара болҕомтону тардыбыттар.
+1
+1
+1
+1
+1
+1
+1