Хамсыгы бохсууга өрөспүүбүлүкэ суһал штабыттан бүгүҥҥү брифиҥҥэ СӨ доруобуйа харыстабылын миниистирэ Елена Борисова кытынна.
edersaas.ru
Миниистир этэринэн, бүгүн 58 киһи бу ыарыыга сутуллубута бэлиэтэммит. Хомойуох иһин, Дьокуускай куоракка 45 киһи дьаҥҥа хаптарбыт. Ону таһынан Мииринэйгэ, Нерюнгрига, Намҥа, Мэҥэ Хаҥаласка ыалдьыбыттар. Уонна дьаҥ хоту сытар Булуҥ, Дьааҥы оройуоннарын тумнубата.
Елена Афраимовна коронавирус инфекциятыгар сыстыбат туһугар бары сэрэтэр миэрэлэри тутуһарга ыҥырда. Кини билигин сүрүн болҕомто үөрэх тэрилтэлэрин саҥа үөрэх дьылыгар бэлэмнээһиҥҥэ уурулларын эттэ. Ол курдук, оскуолалар, оҕо саадтарын, үрдүк үөрэх кыһаларын бу ыарахан дьаҥ кэмигэр хайдах тэринэн үлэлиэхтээхтэригэр болҕомто уурулларын санатта. Онно сөп түбэһиннэрэн, Үөрэх министиэристибэтин, Роспотребнадзор тэрилтэтин кытта сөптөөх ирдэбилгэ анаммыт быраабыла бэлэмнииллэр.
Уоппускаҕа атын сиргэ сынньана барааччыларга туһаайан миниистир бу дьаҥтан анаалыс буолбакка, эпидемиологическай турук туһунан ыспыраапка бэриллэрин эттэ. Бу ыспыраапканы “Облачная поликлиника” көмөтүнэн ылыахха син.
Ити курдук, аан дойдуну аймаабыт дьаҥ соччо хаптайбат. Онон миниистир сэрэтиилэрин истиҥ, бэйэҕитин уонна чугас дьоҥҥутун харыстаныҥ.
Женни СТРЮКОВА, edersaas.ru