Бу күннэртэн Саха сиригэр оҕо тэрилтэлэрин хамсааһыннарын сайыннарар киин үлэлээн эрэр. Ити туһунан СӨ бырабыыталыстыбатын бэрэссэдээтэлэ Михаил Гуляевка буолбут мунньахха олохтоох үөрэх уонна наука миниистирин солбуйааччы Эдуард Кондратьев иһитиннэрэн турар.
Санатан эттэххэ, “Оҕо тэрилтэтин хамсааһынын сайыннарар өрөспүүбүлүкэтээҕи киин” бүддьүөт судаарыстыбаннай тэрилтэтэ Ил Дархан дьаһалыгар олоҕуран тэриллибитэ. Дириэктэр эбээһинэһин толорооччунан балаҕан ыйын 14 күнүттэн “Дьулуур” оҕо уопсай тэрилтэтин салайааччыта, “Арассыыйатааҕы үөрэнээччилэр хамсааһыннара” уопсастыбаннай судаарыстыбаннай тэрилтэ Саха сиринээҕи салаатын бэрэссэдээтэлэ Геннадий Охлопков анаммыта.
Геннадий Ивановичтан тэрилтэ хаһааҥҥыттан, хайдах быһыылаахтык арыллан үлэлээн эрэрин туһунан ыйыталаһа сырыттым. Онуоха күн бүгүн тэрийии үлэтэ бара турарын иһитиннэрдэ. 25 сыл устата уопсастыбаннай тэрилтэ быһыытынан үлэлээн кэлбиттэр, билигин бүддьүөт тэрилтэтигэр кубулуйаллар. Юридическай сирэй быһыытынан устааптанан эҥин бигэргэммиттэр. Саха сиригэр баар оҕо уопсастыбаннай тэрилтэлэрин сүрүннүүр, методическай, инфомационнай көмөнү оҥорор киин буолабыт диэн быһаарда.
Эһиилгиттэн оҕо уонна ыччат хамсааһына, байыаннай-патриотическай, гражданскай-правовой, баҕа өттүнэн үлэлэр диэн хайысхаларынан уопсай үөрэхтээһин эбии бырагыраамаларын үлэлэтиэхтэрэ. Биллэрин курдук, өрөспүүбүлүкэҕэ оҕо уопсастыбаннай тэрилтэлэрэ балачча элбэхтэр. Олору түмэр хайаан даҕаны наада. Мантан инньэ итинэн дьарыктанар анал судаарыстыбыннай, хамнастаах үлэһиттэрдээх киин баар буолла.
Людмила ПОПОВА, “Саха сирэ” хаһыат, edersaas.ru