Биһиги, улахан дьон, халлаан сылыйаатын кытта, түннүктэри, форточкалары аһан кэбиһэр идэлээхпит. Онтубут хаамар, онно-манна ыттар буолбут оҕону кыл да түгэҥҥэ соҕотохтуу хааллардахха, ыарахан содуллаах буолуон сөп. Статистика этэринэн, сылын аайы дойду үрдүнэн тыһыынчанан оҕо түннүктэн түһэн өлөр биитэр улаханнык эчэйэр.
Биһиги өрөспүүбүлүкэбитигэр, хомойуох иһин, номнуо итинник быһылаан таҕыста.
Ааспыт өрөбүлгэ, бэс ыйын 18 күнүгэр, Дьокуускайга 3 саастаах оҕо үһүс этээстэн түстэ. Дьоно атын хоско быстах тахсыбыт кэмнэригэр, түннүккэ ыттыбыт уонна аһаҕас турбут түннүгүнэн түспүт. Ол түмүгэр, ойоҕосторун уонна уҥа буутун уҥуоҕун тоһуппут. Оҕо туруга ама диэн РФ Силиэстийэлиир кэмитиэтин Саха сиринээҕи управлениета иһитиннэрэр.
Санатар буоллахха, былырыын сайын Нерюнгри куоракка 3 саастаах уолчаан иккис мэндиэмэн түннүгүттэн түспүтэ. Ийэтэ куукунаҕа ас астыыр кэмигэр кини аттынааҕы хоско оонньуу сылдьыбыт. Сотору буолан баран, ийэ хоско тыас-уус буолбутун истэн, ойон киирбитэ – форточка аһаҕас, оттон уолчаана дьиэ бетон акылаатыгар сытаахтыыр эбит. Саатар төбөтүнэн түһээхтээбит. Оҕо эрэйдээх от ыйын 12 күнүгэр балыыһаҕа сытан өлөөхтөөбүтэ.
Иккис түбэлтэ Өймөкөөҥҥө буолбута. 2016 сыл от ыйын 14 күнүгэр Уус Ньараҕа ийэ 4 саастаах уолчаанын оскуолаҕа үөрэнэр оҕотугар көрдөрө хаалларан баран, маҕаһыыҥҥа тахсыбыт. Ол кэмҥэ кыра уол үһүс этээс түннүгүттэн охтубут.
Өссө былырыын маннык быһылааннар туохтан сылтаан тахсалларын силиэстийэ уорганнара ырытан-үөрэтэн көрөн баран, пластиковай түннүктэр аһыллалларын харгыстыыр анал сомуоктары туруоруохха наада диэн быһаарбыттара. Ити этиилэрэ өйөбүлү ылан, 2016 балаҕан ыйын 1 күнүттэн олоххо киирбитэ.
Ити уларытыыларга олоҕуран, дьиэлэргэ эрэ буолбакка, оҕо тэрилтэлэригэр эмиэ, түннүктэргэ анал сомуоктар туруоруллуохтаахтар этэ.
Оҕолоргутугар болҕомтолоох буолуҥ!
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.